Qaraǵandy oblysynyń aýylynda boks zaly ashyldy
QARAǴANDY. QazAqparat - Qaraǵandy oblysynyń Jáırem kentinde boks zaly ashyldy. Sportshylar qýanyshty sátti atap ótip, jańa zalda 2007-2008 jyly týǵan balalar arasynda Jáırem kentiniń birinshiligin uıymdastyrdy, dep habarlaıdy QazAqparat tilshisi.
Týrnırge jınalǵandar kent basshylyǵy syıǵa tartqan jattyǵý zalyna joǵary baǵa berdi.
Rymǵalı Muzdybaev Jáırem aýylynda turatyn 70-ke jýyq balany jattyqtyrady. Onyń tárbıelenýshileri óte jaqsy nátıje kórsetýde. Mysal retinde Ulttyq quramanyń múshesi, Halyqaralyq dárejedegi sport sheberi Vıoletta Knıazevany keltirýge bolady.
Tálimger men onyń shákirtteri osyǵan deıin jergilikti mektepte nemese Mádenıet úıinde jattyǵyp kelgen. Endi olarda turaqty túrde daıyndalýǵa múmkindik beretin tamasha boks zaly bar. Negizinen munda bylǵary qolǵap sheberleri jattyǵatyn bolady. Odan bólek, balýandar men sporttyq oıyn túrlerimen shuǵyldanatyn áýesqoılar úshin jaǵdaı qarastyrylǵan.
