Qaraǵandy oblysynyń aýyldary joǵary jyldamdyqty ınternetke qosylýda

QARAǴANDY. QazAqparat – Qaraǵandy oblysynda aýyldyq eldi mekenderdi joǵary jyldamdyqty ınternetpen qamtamasyz etý mindeti sheshilýde. «Tsıfrlyq Qazaqstan» baǵdarlamasy boıynsha memlekettik-jekemenshik áriptestik jobasy júzege asyrylýda. Optıkalyq baılanys jelileri shalǵaı aýyldarǵa tartylýda, dep habarlaıdy QazAqparat tilshisi.

Aqparattandyrý, memlekettik qyzmet kórsetý jáne muraǵattar basqarmasynyń basshysy Rýstam Baıjanovtyń sózinshe, joba oblystyń 52 eldi mekenin qamtıdy.

Onyń aıtýynsha, jyl sońyna deıin 32 aýyldyń turǵyndary keń jolaqty ınternetke qol jetkizedi. 2020 jyly jobany iske asyrý jalǵasady.

Sondaı-aq ol joǵary jyldamdyqty symsyz ınternetpen qamtamasyz etý jóninde aıtyp berdi.

«Aǵymdaǵy jyldan bastap 2021 jyldyń sońyna deıin oblystyń 146 eldi mekeni mobıldik baılanyspen jáne tórtinshi býyndaǵy LTE (4G) ınternetpen qamtamasyz etiledi. Bul bizdiń oblystyń 123 myń turǵynyn qamtýǵa múmkindik beredi», - dedi ol.

QR Tsıfrlyq damý, ınnovatsııalar jáne aeroǵarysh ónerkásibi mınıstrligi halyqty joǵary jyldamdyqty ınternetpen qamtamasyz etetin jobanyń kelesi kezeńin iske asyrýdy josparlap otyr.

Búginde oblystyń barlyq bilim berý mekemelerine keń jolaqty ınternet qosylǵan. Densaýlyq saqtaý salasynda da másele sheshilý ústinde.

«Búgingi tańda Qaraǵandy oblysy halqynyń 98% keń jolaqty joǵary jyldamdyqty ınternetke qosylǵan densaýlyq saqtaý obektilerine tirkelgen. Bul salany 100 paıyzǵa qamtamasyz etý úshin jumystar júrgizilýde. Memlekettik-jekemenshik áriptestik jobasy sheńberinde aýyldardaǵy densaýlyq nysandary spýtnıktik ınternetke qosylady. Aǵymdaǵy jyldyń sońyna deıin barlyq densaýlyq saqtaý nysandary sapaly ınternetpen qamtamasyz etiledi», - dep túsindirdi Rýstam Baıjanov.