Qaraǵandy oblysynyń aýyl ákimi áıelge qol kóterdi degen kúdikke ilindi
QARAǴANDY. QazAqparat –54 jastaǵy áıel ózine Osakarov aýdany Pıoner selolyq okrýginiń ákimi dene jaraqatyn saldy dep shaǵym túsirdi, dep habarlaıdy QazAqparat tilshisi.
54 jastaǵy áıel Qaraǵandy qalasy Ońtústik-Shyǵys bólimine kelip aryz jazǵan. Shaǵymynda ol sheneýnikpen janjal paıda bolǵanyn, nátıjesinde sońǵysy oǵan dene jaraqatyn keltirgenin málim etken.
«Atalǵan fakti boıynsha polıtsııa qyzmetkerleri Osakarov aýdanynyń 49 jastaǵy turǵynyn anyqtady. Er adamǵa qatysty QR ÁQBK - niń 73-1-baby «Densaýlyqqa qasaqana jeńil zııan keltirý» boıynsha ákimshilik hattama toltyryldy», - dep túsindirdi Qaraǵandy oblysy PD baspasóz qyzmeti.
Sondaı-aq, áıel sot-medıtsınalyq saraptamadan ótken. Mamandar jábirlenýshiniń densaýlyǵyna jeńil zııan keltirgeni týraly qorytyndy jasady.
Sondaı-aq, atalmysh jaǵdaıǵa qatysty memlekettik qyzmetshiniń ádep jónindegi ýákili, Osakarov aýdany ákiminiń orynbasary Nurlan Lambekov túsinikteme berdi. Ol qazirgi ýaqytta Pıoner aýyldyq okrýginiń ákimi demalysta ekenin atap ótti.
«Ol 1 qyrkúıekke deıin demalysta. Bul oqıǵanyń mán-jaıyn biz bilmeımiz. Ol jumysqa shyqqan boıda biz arnaıy tekserý júrgizemiz», - dedi Nurlan Lambekov.
