Qaraǵandy oblysynyń aýmaǵyndaǵy joldar jóndelip, týrıstik nysandar jańǵyrtylmaq

«Jumys kúni búgin Balqashta bastaldy. «Qazavtojol» basshylyǵymen birge «Qaraǵandy-Balqash» jáne «Balqash-Býrylbaıtal» avtojoldarynyń ýchaskelerin rekonstrýktsııalaý barysyn tekserdik. Jumystar belsendi júrgizilýde. Osy jyly 4 jolaq boıynsha jol júrýdi qamtamasyz etý josparlanýda.

Budan basqa, jergilikti «Prostornoe-Jaryq-Aqsý-Aıýly-Aqtoǵaı-Balqash» jolynyń 2 ýchaskesi, Tasaral aýylyna kireberis jáne Balqash qalasynyń 7 kóshesi ortasha jóndeýden ótedi, sondaı-aq qaladan 3-shi km-den bastap Shashýbaı kentine deıingi jol jóndeledi»,-dedi oblys basshysy.

Onyń aıtýynsha, búgin Balqash kýrorttyq aımaǵyn damytý boıynsha keńes ótkizildi.

Respýblıkalyq bıýdjettik komıssııa Bertis shyǵanaǵynyń týrıstik obektilerine elektr qýatyn berý, sýmen jabdyqtaý jelilerin salý boıynsha ótinimderdi qoldady. Mamyr aıynda olardyń qurylysy bastalady. Bul týrıstik aımaqtar úshin kópten kútken joba. Atalǵan jumys 18 bıznes-joba qurylysynyń bastalýyna yqpal etedi.

Torańǵylyq jáne Shubar-Túbek kentterin qala shekaralaryna qosqannan keıin jaǵalaý aımaǵynyń 22 km ınjenerlik kommýnıkatsııalarmen qamtamasyz etilip, abattandyrylady. Qyrkúıekke qaraı barlyq qajetti qujattar ázirlenedi. Munda jeke ınvestıtsııalar esebinen 12 demalys aımaǵy men týrızm nysandarynyń qurylysy josparlanýda.

Ótken jyly Balqash qalasy áýejaıynyń ushý-qoný jolaǵyn jóndeý aıaqtaldy. Halyqaralyq avıareısterdiń áýe kemelerin qabyldaý úshin joldy, aerovokzaldy, perrondy rekonstrýktsııalaýǵa qujattar ázirlendi.

«Torańǵylyq jáne Shubar Túbek kentterinde uıaly baılanys sapasy men ınternet jyldamdyǵy boıynsha shaǵymdar barshylyq. Bul rette barlyq uıaly baılanys operatorlaryn talshyqty-optıkalyq jelimen jáne 4G mobıldi ınternetimen qamtamasyz etý máselesi pysyqtalýda»,-deıdi Jeńis Qasymbek.