Qaraǵandy oblysynyń ártisteri marapattaldy
QARAǴANDY. QazAqparat – Qaraǵandylyq tórt ártis «Dara» arnaıy medaline ıe boldy. Osylaısha, sahna qyzmetkerleriniń eńbegin Qazaqstan teatr qaıratkerleri odaǵy joǵary baǵalady, dep habarlaıdy QazAqparat tilshisi.
Medal ıegerleriniń biri Qaraǵandy akademııalyq mýzykalyq komedııa teatrynyń jetekshisi, halyqaralyq baıqaýlardyń laýreaty, QR eńbek sińirgen qaıratkeri Amantaı Ybraev boldy. Ol atalmysh teatrdy 20 jyldan astam ýaqyt basqardy . Sonymen qatar ol áli kúnge deıin ákimshilik jumysty akterlik eńbegimen birge alyp keledi.
Sondaı-aq, S. Seıfýllın atyndaǵy Qaraǵandy oblystyq qazaq drama teatrynyń aǵa ártisi Meken Qısyqovqa da «Dara» medali tabystaldy. Eńbek sińirgen mádenıet qaıratkeri birneshe ret nagradamen, onyń ishinde «Eren eńbegi úshin» medalimen marapattalǵan.
Qaraǵandy memlekettik Halyqtar dostyǵy ordeni orys drama teatrynda akter Pavel Kondratev te «Dara» medaline ıe boldy. Teatr sahnasynda ol toǵyz jyldan beri óner kórsetip keledi.
Qaraǵandymen qosa, medal Jezqazǵandaǵy óner maıtalmandaryna tabystaldy.
Serik Bulǵaqbaev ómiriniń 40 jyldan astam ýaqytyn Jezqazǵan qalasyndaǵy S. Qojamqulov atyndaǵy Qazaq mýzykalyq drama teatryna arnaǵan. Ol QR eńbek sińirgen ártisi, respýblıkalyq teatr festıvalderiniń laýreaty, mádenıet salasynyń úzdigi.
