Qaraǵandy oblysynyń Aqtoǵaı aýdanynda COVID-19 tirkelgen joq
Aqtoǵaı aýdanynyń ákimi Saltanat Ábeýova ZOOM platformasyndaǵy onlaın-konferentsııada ózine senip tapsyrylǵan aýmaqtaǵy epıdjaǵdaı týraly jáne Jumyspen qamtý jol kartasy aıasynda júzege asyrylyp jatqan jobalar týraly aıtyp berdi.
«Bizdiń aýdanda koronavırýs ınfektsııasyn juqtyrǵandar joq. Biraq buǵan qaramastan, sanıtarlyq qaýipsizdik boıynsha barlyq sharalar qabyldanýda. Áleýmettik-mádenı ortalyqtar men mekemeler qashyqtan jumys isteıdi. Memlekettik mekemelerde, kásiporyndar men nysandarda qyzmet kórsetý barysynda sanıtarlyq talaptar kúsheıtilgen. Sanıtarlyq-epıdemıologııalyq talaptardyń saqtalýyn baqylaý úshin tórt mobıldi top jumys isteıdi», - dedi Saltanat Ábeýova.
Aqtoǵaı aýdany basshysynyń aıtýynsha, ortalyq aýrýhananyń juqpaly aýrýlar bóliminde KVI-men aýyratyndarǵa 9 tósek, 26 karantındik jáne 66 táýlik boıy jumys isteıtin oryndar daıyndaldy, sondaı-aq qajetti dári-dármek qory bar.
Budan bólek, ol Jumyspen qamtý jol kartasy boıynsha júzege asyrylyp jatqan jobalar týraly aıtyp ótti. Aýdanda jalpy quny 850 mıllıon 203 myń teńgeni quraıtyn 43 joba boıynsha jumys júrgizý josparlanýda.
«Bul rette kósheni jaryqtandyrý, sondaı-aq barlyq 16 aýyldyq okrýgterdegi joldardy jóndeý jumystary qarastyrylǵan. Mektepterde jóndeý jumystary júrgizilýde. Jumyspen qamtý jol kartasy boıynsha Saryshaǵan jáne Shashýbaı kentterindegi sý, jylý jáne káriz júıeleri jóndelýde. Qazir 12 joba boıynsha jumystar júrgizilýde», - dep túsindirdi Aqtoǵaı aýdanynyń ákimi.
Jumyspen qamtýdyń jol kartasy boıynsha kózdelgen josparlardy júzege asyrý úshin 220 jumys orny qurylady, onyń ishinde 112 adam jumyspen qamtý ortalyqtary arqyly tartylady.
Aýdanda «Aýyl - el besigi» baǵdarlamasy da belsendi jumys isteıdi, ol eki kezeńde júzege asyrylady.
«Birinshi kezeń sheńberinde belgilengen jumystar Aqtoǵaı jáne Shashýbaı aýyldarynda júrgizilýde. Shashýbaıdaǵy Otbasylyq-dárigerlik ambýlatorııa aıaqtalýǵa jaqyn. Eki medıtsınalyq jobanyń biri Aqtoǵaı aýylynda júzege asyrylýda - munda aýrýhananyń janynda jas mamandarǵa arnalǵan ǵımarat jóndelýde. Sondaı-aq, jol jóndeý jumystary júrgizilip jatyr - Aqtoǵaı kentinde bul jumystar osy aıdyń sońyna deıin aıaqtalady», - dep Saltanat Ábeýova «Aýyl - el besigi» baǵdarlamasy aıasyndaǵy jumystarmen tanystyrdy.
Jumystyń ekinshi kezeńi boıynsha barlyq konkýrstyq rásimder júrgizildi, dep atap ótti Aqtoǵaı aýdanynyń ákimi. Mysaly, Shashýbaı aýylyndaǵy mádenıet úıiniń qurylysyna konkýrs aıaqtaldy, merdiger anyqtaldy. Sonymen qatar, aýdannyń Ortalyq saıabaǵy boıynsha konkýrstyq rásim aıaqtaldy.
S.Ábeýova sondaı-aq barlyq jumystar tıisti baqylaýda ekenin jáne olardy belgilengen merzimde aıaqtaý josparlanyp otyrǵanyn atap ótti.