Qaraǵandy oblysynyń ákimi Jezqazǵandy damytýdyń úsh jyldyq josparyn ázirleýdi tapsyrdy
ASTANA. QazAqparat - Qaraǵandy oblysynyń ákimi Erlan Qoshanov jumys saparmen Jezqazǵanda boldy. Áleýmettik sala men ónerkásiptegi jaǵdaımen, ınfraqurylymnyń jaǵdaıymen tanysqan aımaq basshysy qalanyń áleýmettik-ekonomıkalyq damýy boıynsha kóshpeli keńes ótkizdi.
Máselelerdi sheshýge basa nazar aýdaryldy. Oblys ákimi aktıv otyrysyna deıin jergilikti aqsaqaldardy qabyldady, dep habarlaıdy óńir basshysynyń baspasóz qyzmet i.
Jezqazǵanda 2017 jyl joldardy jóndeý jyly bolyp taǵaıyndaldy. Osy maqsatta 1,2 mıllıard teńge jumsalady. Bul ótken jylmen salystyrǵanda bes esege artyq. Oblystyq bıýdjetten 945,4 mıllıon teńge, jergilikti bıýdjetten 193,5 mıllıon teńge bólindi. Osy somaǵa 23 shaqyrymnan artyq qalalyq joldy jóndeý josparlanǵan.
Bul qarjy bir merdigerge berildi. Kompanııa asa kólemdi jumysty oryndaı ala ma? Oblys ákimi jumystardyń merzimi men sapasyn qatań baqylaýdy tapsyrdy, qoǵamnan kómek surady.
«Jezqazǵan aımaǵynyń joldary - kókeıkesti máselelerdiń biri. Bizdiń ortaq mindetimiz - barlyq protsedýralar men jóndeý jumystaryn sapaly jáne merziminde oryndaý. Jezqazǵan qoǵamyn jol jabynynyń sapasyn baqylaýǵa úles qosýǵa shaqyramyn», - dedi Erlan Qoshanov.
Aktıv otyrysynda Jezqazǵandaǵy baǵalar da sóz boldy. Qalada áleýmettik-mańyzdy sanatyndaǵy azyq-túliktiń 10-nan túri qymbattaǵan. Baǵalardy ustap turatyn júıeli sıpattaǵy sharalar qajet.
«Buryn Talap jáne Keńgir aýyldarynda dámdi qarbyz, kókónis ósetin. Al qazir sýarylatyn 4,5 myń gektar jer paıdalanylmaıdy. Jer ınspektsııasy menshik ıelerine jerlerdi maqsatty paıdalaný qajettiligi týraly uıǵarym berdi. Nege olarmen jumys istemeısizder?», - degen aımaq basshysy qalalyq bılikti synǵa aldy. - Nátıjesinde, kartop pen kókónistar syrttan ákelinedi, al baǵalar elimizdegi eń joǵary baǵalardyń biri. Jyl basynan beri kartoptyń baǵasy 31%-ǵa, pııaz - 25%-ǵa, maı - 12%-ǵa ósken. Bul úshin de sizder jaýaptysyzdar».
Keńes barysynda Jezqazǵanda shaǵyn jáne orta bıznestiń nashar damyp kele jatqandyǵy atap ótildi. 2016 jyldyń sáýir aıymen salystyrǵanda, ShOB sýbektileriniń sany 2% kemidi. Jyl basynan beri ınvestıtsııalar kólemi eki esege tómendedi.
«Jezqazǵanda 2010 jyldan bastap kásipkerlikti qoldaý kartasyna 9 joba ǵana engizilgen. Menińshe, iri ónerkásiptik aımaq úshin bul jetkiliksiz. Tranzıttik dáliz máselesi sheshilgen - «Jezqazǵan - Beıneý» temirjoly salyndy, ǵylymı áleýet jetkilikti - óz ýnıversıtetimiz bar. Qalanyń aınalasynda tústi metall men ken oryndary ıgerilip jatyr. Biraq áleýet tolyq paıdalanylmaı otyr. Jańa usynystar men bastamalar joq. Іske qosylǵan óndiristerdiń birde-bireýi jobalyq qýattylyǵyna shyqqan joq. Qoldanystaǵy qoldaý baǵdarlamalaryna qaramastan qalanyń damýynyń júıe qalyptastyrýshy kásiporyndardyń qyzmetine táýeldiligi tómendemeı keledi», - dedi Erlan Qoshanov.
«Qazaqmys» korporatsııasy» JShS basqarýshy keńesiniń bas dırektory Bahtııar Krykpyshev Jezqazǵan aımaǵyndaǵy óndiristiń damý perspektıvalary týraly baıandady.
Keńeste qurylys pen kommýnaldyq saladaǵy problemalar týraly aıtyldy. Jezqazǵanda densaýlyq saqtaýdy jaqsartý úshin aýrýhana qalashyǵy qalpyna keltirilmek. Úlken konsýltatıvtik-dıagnostıkalyq korpýs ornalastyn orynjaı bar. Ony jóndeýge jáne jaraqtandyrýǵa shamamen 500 mıllıon teńge qajet.
«Jezqazǵan oblystaǵy iri qalalardyń biri, tústi metallýrgııanyń negizin qalaıdy. Sondaı-aq, aımaq ekonomıkasynyń 6% jýyǵyn quraıdy, - dedi Erlan Qoshanov. - Jezqazǵan turǵyndarynyń ıgiligi úshin barlyq máselelerdi sheshý kerek. Bul qalanyń bolashaǵy zor».
Oblys ákimi Jezqazǵandy damytýdyń úsh jyldyq josparyn ázirleýdi tapsyrdy. «Onda barlyq aspektilerdi kórsetý kerek, ekonomıkadan balalar alańdaryna deıin», - dep atap ótti ol. Aımaq basshysy qoǵamdy óz usynystaryn jasaýǵa jáne jergilikti atqarýshy organdarmen qalany damytýdyń tıimdi baǵdarlamasyn anyqtaýǵa shaqyrdy.
