Qaraǵandy oblysynyń ákimi Jeńis Qasymbektiń halyqpen eseptik kezdesýi bastaldy
QARAǴANDY. QazAqparat - Qaraǵandy oblysynyń ákimi Jeńis Qasymbek tikeleı efırde jyl saıynǵy halyq aldynda esep berýin bastady. Bıylǵy jyly kezdesýdiń formaty ózgerdi. Karantınge baılanysty ol onlaın rejıminde ótedi, dep habarlaıdy QazAqparat tilshisi.
Esep berý kezdesýin oblystyń barlyq telearnalary tikeleı efırde kórsetedi. Sondaı-aq, ınternetten de kórýge bolady: oblys ákimdiginiń resmı akkaýntynda - Akimat09 , Saryarqa TV YouTube arnasynda, ekaraganda.kz saıtynda.
«Búgin meniń esebim bir aı ishinde ótken barlyq deńgeıdegi ákimderdiń qorytyndy kezdesýlerin aıaqtaıdy. Barlyǵy 423 kezdesý ótti, oǵan 44 myńǵa jýyq adam qatysty. Bir jyl buryn esep berý kezdesýinde sizder TKSh, joldar men kóshelerdi jóndeý, qoǵamdyq kólik sapasy, áleýmettik nysandardy salý jáne jóndeý, turǵyn úımen, sýmen, jylýmen qamtamasyz etý jáne t.b. máselelerdi kóterdińizder. Birde-bir ótinish nazardan tys qalǵan joq. Alaıda pandemııa bizdiń josparlarymyzǵa aıtarlyqtaı túzetýler engizip, resýrstardy bólýdegi basymdyqtardy qaıta qaraýǵa májbúr etti», - dedi Jeńis Qasymbek.
Turǵyndardyń densaýlyǵyn saqtaý, turaqty tabysty qamtamasyz etý, bıznesti qoldaý, sapaly jáne qoljetimdi bilim berý máseleleri birinshi kezektegi mindetter boldy.
2020 jyly memlekettik baǵdarlamalardyń arqasynda oblysta 35 myń jańa jumys orny ashyldy, dep habarlady óńir basshysy. Bul jumyssyzdyq deńgeıin 4,6% órsetkishte ustap turýǵa múmkindik berdi.
Jeńis Qasymbek óz sózinde 2020 jyldyń qorytyndysyn shyǵaryp, bıylǵy jyly atqarylatyn jumys týraly aıtyp beredi. Sodan keıin turǵyndardyń suraqtaryna jaýap beredi. Efır kezinde tikeleı jeli jumys isteıdi: suraqtar men ótinishter 109 nómiri boıynsha jáne WhatsApp 8-708-703-58-58 nómirine qabyldanady.
Sonymen qatar, esep berý kezdesýin translıatsııalaý úshin oblys ortalyǵynyń túrli núktelerinde LED-ekrandar ornatyldy:
- Suryptaý: Temirjolshylar MÚ, M.Mámetova k-si, 111;
- Prıshahtınsk: «Molodejnyı» MÚ, 22-shi sh / a, 27/1;
- Maıqudyq: Jańa Maıqudyq MÚ, Magnıtogorskaıa k-si, 19;
- Ońtústik-Shyǵys: Dostyq úıi, Shahterler dańǵyly, 64;
-Jańa qala: kenshiler MÚ, Buqar jyraý dańǵyly, 32.
