Qaraǵandy oblysynyń ákimi jastardyń kásip ashýyna 2 myń óteýsiz grant bólmek

QARAǴANDY. QazAqparat - Qaraǵanda oblysynyń ákimi jastardyń kásip ashýyna 2 myń óteýsiz grant bólgeli otyr. Bul týraly Qaraǵandyda oblystyq máslıhat depýtattarynyń ótken jyly atqarǵan jumystarynyń qorytyndysyna baılanysty ótken jıyn barysynda málim boldy, dep habarlaıdy QazAqparat.

Jıynda jastarǵa qatysty kóterilgen máselege pikir bildirgen Qaraǵandy oblysynyń ákimi Jeńis Qasymbek birqatar jaǵymdy jańalyqtardan habardar etti.

«Biz «2022 jylǵa deıin «jetim balalar» jáne «ata-anasynyń qamqorlyǵynsyz qalǵan balalar» sanatyndaǵy jastarǵa 618 páter bólýdi josparlap otyrmyz. Tórt stýdenttik jataqhana paıdalanýǵa beriledi. Eki jyl ishinde keminde 300 jas maman qyzmettik baspana alady»,-dedi ákim.

Sondaı-aq Jeńis Qasymbek óńirde oblystyq jáne 18 aımaqtyq jastar resýrstyq ortalyqtary jumys isteıtinin atap ótti. Munda memlekettik baǵdarlamalar boıynsha keńes beriledi. Sonymen qatar psıhologııalyq jáne quqyqtyq kómek kórsetiledi. Bul baǵytta jol kartasy da ázirlenedi.

«Kóktemde oblystyq IT-hab ashýdy josparlap otyrmyz. Ol 10 myń jas IT-mamandardan turatyn óńirlik komandany biriktirip, qurylady»,-dedi.

Osy rette oblys ákimi balalar men jastar qaýipsizdigi taqyrybyn da kóterip, depýtattardy turmystyq zorlyq-zombylyq, onyń ishinde balalar men jasóspirimderge qatysty máselelerdi birlesip sheshýge shaqyrdy.

«Jalpy jastar máselesinde problemalar da joq emes. Oqýǵa asa yntasy joq, jumysqa asa beıildi emes jastar bar. Osylaı kete beretin bolsa, bolashaqta olar halyqtyń problemalyq toptaryna aınalady. Sondyqtan bilim berýge, jańa óndirister qurýǵa, kompanııalarǵa qajetti mamandardy oqytý men qaıta oqytýǵa barynsha kóp kóńil bólý kerek», - dep atap ótti Jeńis Qasymbek.