Qaraǵandy oblysynyń ákimi jas aýyl kásipkerlerine granttardy tabystady
ASTANA. QazAqparat - Qaraǵandy oblysynda on jas kásipker aýyldar men kentterde bıznesterin damytý úshin granttarǵa ıe boldy.
Granttardy saltanatty túrde tabystaý rásimi Abaıda aýyl jastarynyń HІV forýmy aıasynda ótti, dep habarlaıdy óńir ákimdiginiń resmı saıty.
Forýmǵa Qaraǵandy oblysynyń ákimi Erlan Qoshanov, oblystyq basqarmalardyń, aýdan jáne aýyl ákimdikteriniń jetekshileri men óńirlik jastarmen jumys jasaý ortalyqtarynyń basshylary, jas aýyl kásipkerleri men úkimettik emes uıymdardyń ókilderi qatysty. Forým barysynda jastarǵa arnalǵan memlekettik baǵdarlamalar men jobalardy túsindirý maqsatynda jastardy jumyspen qamtý, jastar kásipkerligin damytýǵa arnalǵan basqa da baǵyttarda semınarlar ótkizildi.
Sonymen qatar, aýyldaǵy kásipkerlikti damytý jáne qoldaýǵa oblys ákiminiń grantyn tabystaý rásimi ótti.
- Búgin biz forým aıasynda jaqsy áńgime qurdyq, qyzyqty suraqtardy talqyladyq,- dedi oblys ákimi Erlan Qoshanov.- Bolashaqta taǵy jınalamyz degen úmittemin. Jastar - el bolashaǵy. Sol sebepti kelesi jyldan bastap biz grant kólemin eki esege, mıllıon teńgege deıin kóterýdi sheshtik.
Bıyl 10 adam grant ıegerleri atandy. Olar:
- Azamat Qanyshev (Botaqara aýyly);
- Stanıslav Motsnyı (Kókpekti aýyly);
- Dına Talıýkenova (Atasý aýyly);
- Saıan Aqyjanov (Janatoǵan aýyly);
- Nurjan Erkin (Qarqaraly qalasy);
- Áıgerim Asılova (Kertendi aýyly);
- Maqpal Janǵarashova (Kıevka aýyly);
- Aqbópe Qoqanova (Kertendi aýyly);
- Qaraqat Qanatbek (Aqsý-Aıýly aýyly);
- Araılym Orazbekova (Aqshataý aýyly).
Grant kólemi 200 000 men 500 000 teńge aralyǵynda boldy. Bul qarjyǵa jastar óz isterin damytpaq.
Mysalǵa, Nurjan Erkin 2009 jyldan beri aıaq kıim jóndeýmen aınalysady. Endi ol óz isin keńeıtpek, sebebi aýdan boıynsha jalǵyz ózi osy ispen aınalysýda.
- Bizge bildek qajet, grantty sol qurylǵyny satyp alýǵa jumsaımyz. Qazir ulym bárin qolmen jasaıdy, bildekpen biraz jeńil bolar edi. Jáne basqa da kerek-jaraǵymyzdy alamyz,-deıdi Nurjannyń anasy.
Taǵy bir grant ıegeri Áıgerim Asylova óz aýylynda aspazdyqpen aınalysýda. Ol da utyp alǵan grantyna óz isine qajet zattardy satyp almaq.
Aýyl jastarynyń forýmyn ótkizý Qaraǵandy oblysynda dástúrge aınalǵan. Sharanyń basty maqsaty - aýyl jastarynyń ózekti máseleleri
men suraqtaryn ortaǵa salyp, sheshý joldaryn qarastyrý, atalǵan baǵyttaǵy atqarýshy organdar men úkimettik emes uıymdardyń birlesken is-áreketin úılestirý, jastardy áleýmettik qoldaý.
