Qaraǵandy oblysynyń ákimi jaryqtandyrý máselesin sheshýge ýáde berdi

Búgingi kúni oblys ortalyǵyndaǵy kóshelerdiń 75% jaryqtandyrylmaǵan. Bul máseleni sheshý úshin ınvestorlar memlekettik-jekeshelik áriptestik qaǵıdaty boıynsha tartylmaq. Olar ınjenerlik kommýnıkatsııalardy, jaryqtandyrý tirekterin jáne shamdardy ózderi qarjylandyrady.

«Búginde mundaı kompanııalar Qaraǵandyda, Nur-Sultanda jáne basqa qalalarda bar. Olar barlyǵyna óz aqshalaryn jumsaıdy. Sodan keıin sol jelilerdi 6-7 jyl boıy paıdalanylady. Sondyqtan sapaly qurylys bolady. Sodan keıin ákimdik teń úlestermen osy merzim ishinde barlyǵyn satyp alyp, kommýnaldyq menshikke beredi. Mundaı tájirıbe búkil álemde jumys isteıdi. 2021 jyly osyndaı baǵdarlama aıasynda kóshelerdiń jartysyn jaryqtandyrýǵa tyrysamyz», - dep túsindirdi aımaq basshysy.

Sonymen qatar, Jeńis Qasymbek kelesi jylǵa arnalǵan memlekettik satyp alýlardaǵy qazaqstandyq qamtý úlesi týraly suraqqa jaýap berdi. 2020 jyly Qaraǵandy oblysy ónerkásiptiń birneshe salasynda jergilikti qamtý úlesin ulǵaıtty. Atap aıtqanda, qurylys, tamaq jáne jeńil, sondaı-aq jıhaz óndirisinde.

Jyl boıy jergilikti júıe quraýshy kompanııalarmen qazaqstandyq jáne Qaraǵandy ónimderin ilgeriletý máseleleri boıynsha 22 keńes ótkizildi.

Jeńis Qasymbek bul oraıda metallýrgııalyq kombınatty mysalǵa keltirdi.

«ArselorMıttal Temirtaý» AQ satyp alýlarynda óńdeý ónerkásibiniń daıyn óniminiń úlesin 4,5 esege arttyrýǵa qol jetkizildi. Jyl basynda 5 mlrd teńge boldy, 11 aıdyń qorytyndysy boıynsha ol kórsetkish 24,5 mlrd teńgege jetti.

«Bul aıtarlyqtaı ósim. «Qazaqmys» boıynsha da ósim shamamen eki esege artty. «Baǵa – sapa» parametri boıynsha bizdiń ónim ótedi, ol týraly bizde tıisti sertıfıkat bar. Qala quraýshy kásiporyndar satyp alatyn qazaqstandyq ónimniń kólemi kelesi jyly da artady», - dep málim etti oblys ákimi.