Qaraǵandy oblysynyń ákimi jarııa etilmegen keńesshisi jaıly aıtty
QARAǴANDY. QazAqparat - Qaraǵandy oblystyq tarıhı-ólketaný murajaıynda ómirden jarty jyl buryn ótken óńirdiń saıası qyzmetkeri Sultan Dosmaǵambetovtyń tulǵalyq kórmesi ashyldy, dep habarlaıdy «QazAqparat» HAA tilshisi.
Mádenı is-shara Qazaqstan Respýblıkasy Táýelsizdiginiń 25 jyldyǵy men Qaraǵandy oblysynyń 80 jyldyǵy aıasynda ótken.
«Búgin osy jerde turyp sóz sóıleý maǵan óte aýyr. Osy zalda Sultan Qaparulymen birge jumys jasaǵan basshylar otyr. Adamı turǵyda Sultan Qaparulymen birge eńbek etkenderińizge qyzyǵamyn. Maǵan ondaı baqyt buıyrmady», - dedi Qaraǵandy oblysynyń ákimi Nurmuhambet Ábdibekov. Onyń pikirinshe, kórme keıipkeri barlyq dúnıege taldamaly qaraıtynymen erekshelendi.
«Biz qazir bir adamnyń taǵdyry beınelengen fılm arqyly óńirdiń damý kezeńin tamashalaǵandaı sezindik. Bul - esimi máńgi saqtalatyn iri azamat», - dep atap ótti Ábdibekov. - Men tek sońǵy eki jylda atalmysh tulǵamen tanys boldym. Osynda kelgen alǵashqy kúnnen bastap (Qaraǵandy oblysynyń ákimi retinde taǵaıyndalǵan - avt.), bul kisiniń basshy retinde qamqorlyǵyn sezindim. Sultan Qaparuly óz keńesterimen dál sol ýaqytta qandaı máselege kóńil aýdarý kerektigin aıtyp, qıyndyq bolǵan kezde árdaıym qoldaý kórsetti. Ómirlik jáne saıası tájirıbesi mol tulǵa ekenin bile otyryp, kez kelgen ózekti máseleni sheshý barysynda osy kisimen aqyldasyp otyratynmyn». Qarbalas oqıǵalar ortasynda bolý - adam baqyty ekenin atap ótti oblys ákimi.
«Bul kisiniń aldynda basymdy ıemin. Ol Qazaqstannyń, Qaraǵandy oblysynyń damýyna Keńes Odaǵy dáýirinde de, táýelsizdik alǵannan keıin de úlken úles qosty, - dedi óńir basshysy óz sózinde. - Bul kórme - eń aldymen, jastarǵa degen syılyǵymyz boldy. Ekinshiden, Sultan Qaparulyna degen qurmetimizdiń belgisi».
Tulǵalyq kórmede ardager balalary eksponattar usyndy. «Sultan Dosmaǵambetov ómiriniń 60 jylyn Qaraǵandy oblysyna arnady. Bul kisi túrli laýazymdy qyzmetterdi atqara otyryp, óńirdiń damýyna qomaqty úles qosty. Sol sebepti osyndaı tulǵalyq kórme uıymdastyrýdy jón kórdik. Týystaryna ótinish jasadyq, balalary otbasylyq muraǵattan materıaldar berdi. Bolashaqta da ol dúnıelerdi osy murajaıda qaldyrady», - dedi Qaraǵandy oblystyq tarıhı-ólketaný murajaıynyń dırektory Erjan Nurmaǵanbetov. Kórme bir aıǵa sozylady. Murajaı ary qaraı óńirdiń aıtýly tulǵalary jaıly kórme uıymdastyrýdy da josparlaýda.
Sultan Dosmaǵambetov (01.09.1928 - 31.07. 2016 ) - Qaraǵandy oblysy men Qaraǵandy qalasynyń qurmettti azamaty. Eńbek jolyn 1946 jyly mektep muǵalimi retinde bastap, Almaty zań jáne Qaraǵandy polıtehnıkalyq ınstıtýttarynda ustazdyq jasady. 1963 jyly Qaraǵandy oblystyq partııa komıtetiniń hatshysy bolsa, 1969 jyly Qaraǵandy oblystyq atqarý komıtetiniń tóraǵasy bolyp saılanady. 15 jyl boıy Qaraǵandy pedagogıkalyq ýnıversıtetiniń rektory retinde qyzmet atqarady. 1997-1999 jyldary Qaraǵandy oblystyq máslıhatynyń hatshysy retinde abyroıly jumys jasady. Sultan Dosmaǵambetov - «Ortalyq Qazaqstan: tabıǵaty men tabıǵı resýrstary, oqıǵalar men adamdar, reformalar men damýy» týyndysynyń avtory. Budan basqa ekonomıka, pedagogıka, quqyq taqyrybyndaǵy 200 ǵylymı eńbekter jazǵan. Lenın, Eńbek Qyzyl Tý (tórt ret), «Qurmet belgisi», «Qurmet» ordenderi men medaldarynyń úshinshi dárejeli «Shahter dańqy» belgisiniń ıegeri.
