Qaraǵandy oblysynyń ákimi jalaqy bermeı, qaryzdanǵan jumys berýshilerdi kommýnaldyq ıgilikten aıyrýdy usyndy
QARAǴANDY. QazAqparat - Qaraǵandy oblysynyń ákimi Nurmuhambet Ábdibekov jalaqydan qaryzy jınaqtalǵan jumys berýshilerge qysym kórsetýdiń jańa tásilin oılap tapty.
«Bul jaǵdaı alańdaýshylyq týdyrýda, atqarýshy bılik jedel den qoıyp, áleýmettik qysymdy boldyrmaý, eńbek daý-damaıynyń týyndaýynyń aldyn alý boıynsha saqtandyrý sharalaryn qabyldaýy qajet. Eger qyzmetker ýaqtyly jalaqy almasa, onyń kommýnaldyq qyzmetter boıynsha qaryzy paıda bolady. Bul qyzmetkerdiń qaryzy aqsha tólemeı otyrǵan jumys berýshige batatyndaı tásil bolǵany durys. Muny qalaı jasaýǵa bolady? Bálkim, sot sheshimimen onyń kottedjindegi elektr energııasyn, sýyn sóndireıik, ol qaramaǵyndaǵy jumysshyǵa tolyq jaýapkershilikti ótkeretinin túsinýi tıis», - dedi N. Ábdibekov apparattyq májiliste.
Óńir basshysy jumys berýshilerdi sabasyna túsirýdi tapsyrdy. «Baspasóz arqyly mundaı «batyrlardy» barynsha kóbirek jarııalaý qajet». Oblys ákimi eńbek ınspektsııasyna osyndaı tapsyrma berdi.
Eńbek ınspektsııasy basqarmasynyń málimetterine sáıkes ýákiletti organ 8 aıda 836 kásiporyn men uıymdardy tekserdi. 1800-den astam azamattar shaǵymyn qarady. Tekserý qorytyndysynda 1331 buzýshylyq anyqtalyp, 419 nusqama shyǵaryldy. 87 paıyz zań buzýshylyq joıyldy. Tekserý nátıjesi boıynsha 233 zańdy jáne laýazymdy tulǵaǵa jalpy somasy 30, mln teńge aıyppul salyndy.
Jyl basynan beri kásiporyn basshylarynan jalpy somasy 14,1 mln teńgege 91 ákimshilik aıyppul óndirip alyndy.
