Qaraǵandy oblysynyń ákimi: Sý tasqynyna toıtarys berýge daıynbyz
ASTANA. QazAqparat - Qaraǵandy oblysynyń ákimi Erlan Qoshanov aımaq basshylyǵynyń kelesi kóktemde bolýy múmkin sý tasqyndaryna tas-túıin daıyn ekenin jetkizdi, dep habarlaıdy «QazAqparat» HAA tilshisi.
«Shynynda da, Qaraǵandy oblysynda sý tasqyny máselesi ózekti bolyp tur. Ol máseleni ózderińiz bilesizder. Klımattyń ózgerýine baılanysty ma, áıteýir ártúrli boljamdar aıtylady. Sońǵy jyldary rasynda tabıǵı jaǵdaılar jıilep ketti. 2015 jyly biletinderińizdeı, sý tasqyny bolyp, úıler qulady, adam shyǵyny da boldy. Men óńirge ákim bolyp kelgeli sý tasqynynyń aldyn alý jumystarymen aınalystym. Bıylǵy jyly biz óte az shyǵynmen óttik dep oılaımyn», - deıdi Erlan Qoshanov.
Óńir basshysynyń sózine sensek, bıyl sý tasqyny bolýy múmkin óńirlerdegi úılerdiń bári aman qalǵan.
«Biraq, ol kelesi jyldary osy apattardy boldyrmaý úshin tıisti jumystardy atqaryp jatyrmyz. Birinshiden, Úkimettiń úlken jol kartasy bar. Biz kezeń-kezeńmen Premer-Mınıstrdiń aldynda esep berip otyramyz. Oblysta eki kezeńnen turatyn jumys júrgizilýde. Birinshisi - shuǵyl jumystar. Sý tasý qaýpi bar eldi mekender boıynsha naqty jumystar, ıaǵnı eldi mekenderdi tasqynnan qorǵap qalý jumystary júrgizilýde. Sol sanatta 9 eldi meken bar. Barlyǵynyń aınalasyna topyraqtan sapaly bıiktigi bir jarym metrlik bógetter jasaldy. Men olardy ózim baryp qarap shyqtym. Sonymen birge, gabıon degen qondyrǵylar arqyly aýyldy mekenderdi qamtamasyz ettik. Kelesi jylǵy tabıǵı jaǵdaılarǵa bul aýyldar daıyn dep oılaımyz», - deıdi aımaq basshysy.
Erlan Qoshanov sonymen birge, kóktem kezinde Nura, Sherýbaı Nura, Toqyraýyn, Soqyr ózenderi qatty tasıtynyn eske saldy.
«Bulardyń túbin tazalaý jumystary júrgizilýi kerek. Bul baǵytta jobalyq-smetalyq jumystary júrip jatyr. Tıisti qarjy bólindi. Kelesi jyly kóktemnen bastap tıisti jumystar júrgiziledi», - dep túıdi oblys ákimi.
