Qaraǵandy oblysynyń ákimi sý tasqynyna daıyndyq barysyn tekserdi
Buqar jyraý aýdanynyń Chkalov aýyly sý basý qaýpi joǵary aımaqtar qataryna kiredi. Bul eldi meken oblys jáne TJD basshylyǵynyń erekshe baqylaýynda. Jeńis Qasymbek aldymen osynda boldy.
«Men apta saıyn jaǵdaıdy baqylaımyn. Biz meteorologtarmen, Tótenshe jaǵdaı departamentimen tyǵyz jumys isteımiz. Sý tasqyny kezeńine daıyndyq úshin barlyq qajetti tehnıka bar», - dedi oblys ákimi.
TJD bastyǵy Ibragım Kúlshimbaevtyń aıtýynsha, bıylǵy jyldyń qańtar aıynda qar normadan úsh ese kóp túsken. Osyǵan baılanysty Nura ózeni basseınindegi ylǵal qory 157%-ǵa deıin ósken.
«Sý tasqynynyń aldyn alý jáne adamdardyń qaýipsizdigin qamtamasyz etý sharalaryn biz aldyn ala júrgize bastadyq. Ótken jyly qaýipti aýmaqqa jaqyn ornalasqan 140 eldi mekende qorǵanys úıindileri turǵyzylyp, gabıondar ornatyldy. Ótken kóktemde Samarqand sý qoımasynan sekýndyna 620 tekshe metr jyldamdyqpen sý tógilgen kezde bul úıindiler óz tıimdiligin kórsetti – erigen qar sýy eldi mekenderge túsken joq», - dedi vedomstvo basshysy.
Jeńis Qasymbek Samarqand sý qoımasynyń sý torabyna da baryp qaıtty. Munda sý bosatý jumystary bastaldy. Aqpan aıynyń sońyna deıin taǵy 14 mln tekshe metr sý aǵyzylady. Bul rette sý qoımasyndaǵy ylǵaldyń eń tómengi deńgeıi 1800 mln tekshe metrden tómen bolmaýy tıis. Osy jerden sýdy Temirtaýdaǵy JEO týrbınalaryn sýytý úshin paıdalanady.
Qazir «Qazgıdromet» mamandary sý tasqyny kezeńine naqty boljam jasaý úshin zertteýler men ólsheýler júrgizýde.
