Qaraǵandy oblysynyń ákimi sý tasqyny qaýpi bar aýylda bolyp qaıtty
QARAǴANDY. QazAqparat - Qaraǵandy oblysynyń ákimi Erlan Qoshanov úsh ózenniń ortasynda turǵan Sadovoe aýylynda bolyp, sý tasqynynan qorǵaý jumystarynyń oryndalý barysyn baqylap qaıtty, dep habarlaıda QazAqparat tilshisi.
Qaraǵandy oblysynda kóktemgi sý tasqynynyń qarqyn alý kezeńi bastaldy. Kesheden bastap Samarqand qoımasynan sý jiberý kólemi sekýndyna 610 tekshe metrge deıin arttyryldy. Aǵyndy sý úsh ózenniń ortasynda ornalasqan Sadovoe kentine kelip jetti.
Oblys ákimi Erlan Qoshanov oqıǵa ornyna baryp, jaǵdaıdy óz kózimen kórip qaıtty. Qazirgi tańda qutqarýshylar men jergilikti bıliktiń basty mindeti - úılerdi sý basýdan saqtap, turǵyndardy qorǵaý úshin barlyq sharalardy qoldaný.
2017 jyly Buqar jyraý aýdanynda Chkalovo jáne Sadovoe kentteriniń aınalasynda uzyndyǵy 2-3,5 shaqyrym qorǵanys bógetteri salyndy.
«Biz bul sharalardyń oń nátıje bergenin kórip otyrmyz. Sýdyń kóp kelýine qaramastan, úılerdi sý basqan joq. Ázirge turǵyndardy kóshirýge negiz joq. Búgin sý tasqynynyń qarqyndy kezeńi endi ǵana bastaldy. Aldaǵy bir-eki kúnde budan da kóbirek sý kelýi múmkin. Biz Samarqand sý qoımasy boıynsha durys sheshim qabyldaýǵa tıispiz. Qajet bolǵan jaǵdaıda sý aǵyzý ulǵaıtylady, ol úshin rezerv bar», - dedi Erlan Qoshanov.
Sadovoe aýylynda sý sorǵyzý jumystary men qorǵanys bógetterin nyǵaıtý jalǵastyrylýda. Oqıǵa ornynda oblystyq sý tasqynyna qarsy shtabtyń jyljymaly pýnkti ornalasqan. Eldi mekenge azamattyq qorǵanys jáne jergilikti atqarýshy bıliktiń barlyq kúshteri jumyldyryldy.
Oblystyq TJD bastyǵy Ibragım Kúlshimbaevtyń málimdeýinshe, Sadovoe aýylynda jeke quramnyń 140 adamy, 35 arnaıy tehnıka (júk tıegish, samosval, jol talǵamaıtyn kólik, motopompa jáne t. b) jumyldyrylǵan.
Atalmysh eldi mekende 40-tan astam úı bar, onda 350-ge jýyq adam turady.
Oblys aýmaqtarynyń basym bóliginde qar erip ketken. Alaıda Samarqand, Sherýbaı-Nura jáne Yntymaq sý qoımalarynan sý aǵyzý jumystary erekshe baqylaýda ustalyp otyr.
TJD aqparaty boıynsha, Osakarov, Nura jáne Buqar jyraý aýdandarynyń ózenderinde 8 muz jarý sharasy júrgizildi. Qar sýyn burý jáne eldi mekenderdi qorǵaý úshin 3,7 shaqyrym metr bóget turǵyzyldy jáne nyǵaıtyldy, 3,1 shaqyrym aınalma arnalar qazyldy, 24,8 myń qap tóseldi, 57 myń tekshe metrden astam sý sorǵyzyldy, 950 tonna ınertti materıal paıdalanyldy.
