Qaraǵandy oblysynyń ákimi sý basý qaýpi bar aýmaqtardy tikushaqpen sholyp qaıtty
QARAǴANDY. QazAqparat - Búgin sý tasqyny kezinde óńir turǵyndary men aýmaqtarynyń qaýipsizdigin qamtamasyz etý sharalaryn oryndaý aıasynda oblys ákimi Erlan Qoshanov Qaraǵandy oblysynyń sý tasqyny qaýpi tónip turǵan aımaqtaryn aralap qaıtty, dep habarlaıdy QazAqparat tilshisi.
Barlaý baǵyty Samarqand, Sherýbaı-Nura jáne Jartas sý qoımalary, Buqar Jyraý, Qarqaraly, Abaı jáne Shet aýdandarynyń eldi mekenderi arqyly ótti.
Tikushaqpen aralaý kezinde Shet aýdanynyń Qyzyl aýylynda qoný júzege asyryldy. Oblys ákimi eldi mekendegi sý tasqynyna qarsy is-sharalardy ózi jeke tekserip ótti.
29 naýryzda Shet aýdanynda erigen qar sýynyń deńgeıi ulǵaıýyna baılanysty Qyzylqoı ózeni arnasynan shyǵyp ketti. Sý júrýiniń saldarynan aýyl shetinde ornalasqan eki úı sý astynda qaldy. Oqıǵa ornyna Qaraǵandy oblysy TJD bólimsheleriniń kúshteri men quraldary jiberildi. Qazirgi tańda eldi mekende sý soryp alý jumystary júrgizilýde jáne Qyzylqoı ózeniniń boıynda 1500-ge jýyq (uzyndyǵy 600 metr, bıiktigi 40 sm) qaptardy tóseý arqyly bógetti nyǵaıtý jumystary jalǵasyp jatyr. Qazirgi ýaqytta sý deńgeıiniń tómendeýi baıqalady. Oqıǵa ornyna jergilikti atqarýshy organdar men TJD bólimsheleri jumyldyrylǵan.
Tótenshe jaǵdaılardyń aldyn alý jáne kóktemgi sý tasqyny saldaryn azaıtý maqsatynda Qaraǵandy oblysynda apattyq-qutqarý jáne shuǵyl jumystar jalǵasýda.
Sarysý ózenderiniń basseınderinde Shet jáne Jańaarqa aýdandarynyń aýmaǵynda sý deńgeıiniń kórsetkishteri áli de joǵary. Sondaı-aq, Nura, Sherýbaı-Nura ózenderinde de sý kóleminiń ulǵaıýy baıqalýda.
Jedel túrde qoldanylǵan sharalardyń kómegimen Jańaarqa aýdanynyń Orynbaı jáne Atasý eldi mekenderindegi jáne Abaı aýdanynyń Qulaıǵyr aýylyndaǵy jaǵdaı turaqtaldy. Sondaı-aq, Shet aýdanyndaǵy Kóktinkólde (56 razezd) sý deńgeıiniń tómendeýi baıqalady.
Erigen qar sýynyń qarqyndy júrýi jáne ózenderdiń deńgeıi kóterilýine baılanysty respýblıkalyq, oblystyq jáne jergilikti mańyzy bar avtojoldardyń 5 ýchaskesinde sý aǵyny saqtalýda.
Sý tasqyny jaǵdaıy turaqty baqylaýda.
Oblystyq sý tasqynyna qarsy shtabtyń jumysy jalǵasýda.
