Qaraǵandy oblysynyń ákimi: Men de aýyl mektebinde oqyǵanmyn
ASTANA. QazAqparat - Búgin Qaraǵandy oblysynyń ákimi Erlan Qoshanov Rostovka eldi mekenindegi tirek mektebinde bolyp qaıtty. Bıyl oqý ordasynan 12 oqýshy túlep ushty.
Olardyń tórteýi «Altyn belgi», al ekeýi - erekshe úlgili attestat alýǵa úmitti. Aımaq basshysy túlekterge jyly lebizderin bildirdi. Bul týraly ákimdiktiń baspasóz qyzmetinen habarlady.
«Bul kún shynymen de tolǵandyrar sátke toly. Men ózim de osy sekildi aýyldyq mektepte oqyǵanmyn. Sondyqtan sizderdiń sezimderińiz maǵan tanys. Árıne, sizder úshin bul úlken qýanysh. Erteńgi kúnnen bastap jańa ómir jolyna qadam basasyzdar. Alda áli de baǵyndyrar bıikterińiz kóp bolady. Men sizderge sol jolda sáttilik tileımin. Elbasy sizderdiń jarqyn bolashaqtaryńyz úshin kóp jaǵdaı jasady. Bilimin jetildiremin deýshiler úshin álemdik deńgeıdegi ýnıversıtetterge arnalǵan «Bolashaq» baǵdarlamasynyń stıpendııasy qarastyrylǵan. Al jumys isteımin degenderge memlekettik qoldaý men mamandyqtardyń keń tańdaýy bar. Sizder óz bolashaqtaryńyzdy ózderińiz qurasyzdar. Sizderdiń tańdaýlaryńyz elimizdiń bolashaǵyn kórkeıtýge septigin tıgizedi», - dedi E. Qoshanov.
Oblys ákimine aýyl oqýshylarynyń qandaı jaǵdaıda bilim alatyny kórsetildi. Mektep dırektory Núrıtden Ómirbaev aımaq basshylyǵyna ekskýrsııa ótkizdi.
«Bizde ózimizdiń kenttegi oqýshylarmen qatar, jaqyn mańaıdaǵy 6 eldi mekenniń az qamtylǵan mektepteriniń oqýshylary kelip oqıdy. Ol oqýshylar bizdiń mektepte emtıhan tapsyrady, ózderinde oqytylmaıtyn pánder boıynsha sabaqtarǵa qatysady. Kelip-ketip oqıtyn balalar úshin 60 oryndyq ınternat bar. Al jalpy bizdiń tirek mektebimizde 360 oqýshy bilim alady. Az qamtylǵan mektepterdiń oqýshylarymen qosqanda - 720 adam. Sondaı-aq úsh jastan bastap tárbıelenetin shaǵyn ortalyǵymyz bar», - dep atap ótti mektep dırektory.
Sonymen qatar Erlan Qoshanovqa Rostov mektebiniń pedagogtary bilim berý tájirıbesinde jańa ádisterdi qoldanyp jatqany týraly aıtyldy. Muǵalimder balalardyń fýnktsıonaldy saýattylyǵyn, ǵylymǵa, sportqa jáne shyǵarmashylyqqa degen qyzyǵýshylyǵyn arttyrýdy qolǵa alǵan.
Mekteptiń janynda úsh jylyjaı bar. Onyń ekeýi - jazǵy, bireýi qysqy. Oqýshylar onda kókónister men askók ósiredi eken. Ádette, jınaǵan ónim mektep ashanasynyń azyq-túlik qorynyń tórtten bir bóligin jabady.
Taǵy bir erekshe kóńil tartar nysan - mektep-ınternattyń jertólesinde ornalasqan murajaı boldy. Onyń negizi 2016 jyly qalanǵan eken. Bir jyl aralyǵynda ol oblys boıynsha eń úzdik murajaı kesheni atanyp úlgerdi.
«Bizdiń murajaıymyzda jeti zal bar, - dep túsindirdi mektep dırektory Núrıtden Ómirbaev. - Ekspozıtsııamyz tas dáýirinen bastalady. Munda bólmeniń ózi úńgir ispettes jasalǵan. Onda mamonttardyń múıizi bar. Odan ary qaraı ótseńiz, orta ǵasyr, jeltoqsan oqıǵalaryna, Uly Otan soǵysyna jáne basqa da eleýli tarıhı jaıttarǵa qatysty zaldar bar. Murajaı negizinde tarıh, bıologııa, tipti fızıka men hımııa pánderiniń sabaqtary ótedi.
Esterińizge sala keteıik, búgin elimiz boıynsha barlyq mektepterde sońǵy qońyraý syńǵyrlady. Qaraǵandy oblysynda 481 mektepten 7 537 túlek úlken ómirge qadam basty.
