Qaraǵandy oblysynyń ákimi memlekettik tildi damytýǵa qosqan úles úshin syıaqylardy tabystady
QARAǴANDY. 12 jeltoqsan. QazAqparat - Búgin Qaraǵandyda oblys ákiminiń «Til janashyrlary» baıqaýynyń jeńimpazdaryna syıaqylardy tabys etý rásimi ótti.
«Memlekettik til saıasatyn iske asyrýǵa baǵyttalǵan amaldardyń biri oblys ákiminiń syıaqysyna «Til janashyry» baıqaýyn ótkizý bolyp tabylady. Bul baıqaýdyń maqsaty - memlekettik tildi damytýǵa úles qosqan tulǵalardy qoldaý. Ol alǵash ret ótkizilýde, osydan bastap jyl saıyn uıymdastyrylatyn bolady», - dedi aımaq basshysy Ábilǵazy Qusaıynov.
Baıqaýǵa túrli mekemeler men uıymdardyń, etnomádenı birlestikterdiń ókilderi, elektrondyq jáne baspasóz BAQ-tardyń jýrnalısteri, stýdenttik jastar, memlekettik qyzmetkerler qatysty. Oblys ákiminiń syıaqylary tabystalǵan 10 atalymdaǵy jeńimpazdar tańdaldy.
Marapattalǵandardyń arasynda «Qazaq tili» oblystyq qoǵamynyń tóraǵasy Temirǵalı Kóketaı, «Balqash óńiri» gazetiniń redaktory Janbolat Bashar, «Indýstrıaldyq Qaraǵandy» oblystyq gazetiniń mádenıet jáne bilim bóliminiń meńgerýshisi Olga Moos, QarMTÝ áskerı-tehnıkalyq fakýltetiniń 4 kýrs stýdenti Nıkolaı Solın jáne taǵy basqalary boldy. Memlekettik tildi nasıhattaıtyn úzdik etnomádenı birlestik bolyp Qaraǵandy oblystyq «Vıdergebýrt» nemis ortalyǵy atandy.
