Qaraǵandy oblysynyń ákimi mektepter men kolledjderdiń qoǵamdyq reıtıngin engizýdi tapsyrdy
Bul rette oblys basshysy balabaqshalar men bóbekjaılardy, úıirmeler men sektsııalardy qoljetimdi etý, ınklıýzıvti oqytýdy damytý sııaqty mindetter týraly aıta kele, olar boıynsha qolǵa alý kerek basty 9 baǵytqa nazar aýardy.
1-den 6 jasqa deıingi balalardy mektepke deıingi tárbıemen qamtýdy 84-ten 86,5%-ǵa deıin ulǵaıtý qajet. Jeke ınvestıtsııalardy kóbirek tartý osy kórsetkishke qol jetkizýge kómektesedi.
Bilim berý qyzmetteriniń sapasyn arttyrý úshin oblys ákimi jyl sońyna deıin mektepter men kolledjderdiń qoǵamdyq reıtıngin engizýdi tapsyrdy.
«Oqý mektebi» respýblıkalyq jobasy aıasynda 2022 jyldyń sońyna deıin barlyq mektepter men kolledjderdiń kitaphana qorlaryn jańartý talap etiledi.
Oqýshylardy qosymsha bilimmen qamtý 66,7-den 86%-ǵa deıin ulǵaıtylýy tıis.
Barlyq kolledjderde WorldSkills standarttary boıynsha demonstratsııalyq emtıhandardy engizý qajet. Dýaldi oqytýda stýdentterdi qamtýdy 20%-dan kem emes deńgeıge kóterý jospary qoıylǵan.
Jeńis Qasymbek ınklıýzıvti bilim berýdi, patronattyq tárbıeni, balalar men jasóspirimderge psıhologııalyq kómek kórsetýdi damytý boıynsha da naqty mindetter qoıdy.
Oblysta pedagogterdiń kásibı deńgeıin arttyrý boıynsha jumystar jalǵasady. Kadr tapshylyǵy máselesin sheshý úshin qalalar men aýdandarda muǵalimderge qyzmettik turǵyn úı beriledi.
«Biz ótken oqý jylynyń qorytyndysyn shyǵaryp, bolashaqqa qoıylǵan mindetterdi anyqtadyq. Olardy tabysty iske asyrý pedagogıkalyq ujymdar men barlyq múddeli qurylymdardyń kúsh-jigerin biriktirgen kezde ǵana múmkin bolady», – dep atap ótti Jeńis Qasymbek.