Qaraǵandy oblysynyń ákimi qurylysta jergilikti qamtýdyń artýyn óz baqylaýyna aldy
QARAǴANDY. QazAqparat – Qaraǵandy oblysynyń ákimi Jeńis Qasymbek onlaın rejıminde qurylys salasynda jumys isteıtin bıznesmendermen kezdesti, dep habarlaıdy QazAqparat tilshisi.
«Biz sizderdi qurylystaǵy jergilikti qamtý úlesin arttyrý máselesin talqylaý úshin jınadyq. Osyndaı kezdesýler otandyq óńdeý ónerkásibi ónimderin ilgeriletý boıynsha iri júıe qurýshy kásiporyndarmen ótkizildi. Jeńil ónerkásip boıynsha jeke jınalys boldy. Búgin qazaqstandyq jáne, atap aıtqanda, qaraǵandylyq qurylys ónimderin belsendi paıdalanýǵa ne kedergi keltiretinin estigim keledi», - dedi Jeńis Qasymbek.
Óńirde qurylys salasynda 170-ke jýyq kásiporyn jumys isteıdi.
Qurylys, sáýlet jáne qala qurylysy basqarmasynyń aqparaty boıynsha, oblysta tek memlekettik qarajatqa 69 nysan salynýda. 2020 jyly memlekettik obektilerdegi jergilikti qamtý úlesi 91% qurady.
Sonymen qatar, kásiporyn basshylary oblys ákimine jergilikti qamtý úlesi nólge teń jeke kompanııalarǵa shaǵymdandy. Sheteldik ónimdi jergilikti ónimge uqsas bolǵan jaǵdaıda satyp alatyn birqatar faktiler keltirilgen.
Óndirýshilerge ózderiniń qurylys materıaldaryn iri jobalarǵa satýǵa qalaı kómektesýge bolatyny týraly usynystar aıtyldy.
Qaraǵandy oblysy qurylysshylar qaýymdastyǵynyń atqarýshy dırektory Naılıa Qaıyrbekova jumysty bir tereze qaǵıdaty boıynsha uıymdastyrý qajet dep sanaıdy. Onyń pikirinshe, áleýetti tapsyrys berýshiler men óndirýshilerdiń tikeleı ózara is-qımyly úshin alań qurý sanaly qarym-qatynas dárejesin arttyrady jáne sybaılas jemqorlyq táýekelderin tómendetedi.
«Árıne, «baǵa-sapa» parametrleri sáıkes kelýi tıis. Eger siz árqaısysymen jeke jumys isteýińiz kerek bolsa, biz sizdi qoldaýǵa daıynbyz. Qaraǵandylyq ónimdi satyp alý úshin qarqyndy jumys isteımiz», - dep málimdedi Jeńis Qasymbek.
