Qaraǵandy oblysynyń ákimi kómirge qatysty jaǵdaıdy retteýge bir apta berdi
QARAǴANDY. QazAqparat - Qaraǵandy oblysynyń ákimi Erlan Qoshanov jumys sapary barysynda Jańaarqa aýdany men Jezqazǵan turǵyndarynyń kommýnaldyq-turmystyq qajettilikterine arnalǵan kómir tıeý núktelerin aralady, dep habarlaıdy QazAqparat.
Oblys ákimdiginen málim etkendeı, Jańaarqa aýdanyndaǵy kómir qoımasynyń syıymdylyǵy 600 tonnany quraıdy. Munda kómir Shubarkólden jáne Qaraǵandydan jetkiziledi. Búgingi tańda qoımada 140 tonna kómir bar, ol tek 30% toltyrylǵan. Bul týraly estigen oblys ákimi kómir tıeý núktesin jaqyn arada qajetti kómir kólemimen toltyrýdy tapsyrdy.
«Halyq qysqa kómir satyp alýdy bastady. Al sizderdiń kómir satý núktelerińiz tek 30% toltyrylǵan. Bul óreskel jaǵdaı! Sizderge osy máseleni sheshý úshin bir apta ýaqyt beremin», - dedi Erlan Qoshanov.
Al kómir toly vagondar keletin Jezqazǵannyń temirjol torabyndaǵy kómir qoımasy tek 37% toltyrylǵan. Alaıda, «FerritıK» JShS dırektory Petr Pashnıktiń sózinshe, bul qıyn jaǵdaı emes. Adamdar bul jerden kómirdi túsken kezde birden alyp ketedi, sondyqtan qazir munda eshqandaı dúrligý joq. Jaqyn arada taǵy 4 vagon kómir partııasy keletini kútilýde. Jalpy alǵanda Jezqazǵannyń kómir satý núktesi maýsymyna 2300 tonna qara altyndy satady. Qazan aıynyń sońyna deıin qala turǵyndary tolyǵymen otynmen qamtylatyny josparlanǵan.
Búgingi tańda aımaqtyń kómir kásiporyndary josparly túrde jumys isteýde. Boljam boıynsha Qaraǵandy oblysynda bıyl kómir óndirý kólemi 38 mln tonnany quraıdy. Bul ótken jylmen salystyrǵanda 19% joǵary.
Halyq úshin kommýnaldyq-turmystyq kómir kólemin 1 mln tonnaǵa deıin nemese 24% arttyrý kózdelip otyr.
Barlyǵy oblys aýmaǵynda 38 kómir satý núktesi ornalasqan. Negizgi bes kommýnaldyq-turmystyq kómir jetkizýshiler: «Shubarkól kómir» AQ, «Sat Komır» AQ, «Razrez Kýý-Chekınskıı» JShS, «Razrez Molodejnyı» JShS jáne «Saryarka-Energy» JShS.
