Qaraǵandy oblysynyń ákimi kómir baǵasyna qatysty máseleni anyqtaýǵa tapsyrma berdi
QARAǴANDY. QazAqparat - Qaraǵandy oblystyq ákimdiginde ótken apparattyq jınalysta jeke menshik tutynýshylarǵa arnalǵan kómir baǵasyna qatysty másele talqylandy, dep habarlaıdy óńir basshysynyń resmı saıty.
Oblys ákimi Erlan Qoshanov kómir óndirýshi kompanııalardyń jetekshilerinen máseleniń mán-jaıyn surady. Ol óziniń orynbasarlaryna qara otynnyń baǵasy qalaı quralatynyn egjeı-tegjeıli anyqtaýdy tapsyrdy.
- Halyqqa qajetti kómirdiń tapshylyǵyna qatysty problema bar, - dep kóterdi máseleni Qarajal qalasynyń ákimi Tilektes Dosaev. - «Jalyn» halyqqa qajetti kómirdi shyǵarmaıdy. Al «Shubarkól» baǵany tonnasyna 8500 teńgege deıin kóterip jiberdi. KamAZ júrgizýshileri kómir alý úshin eki-úsh táýlik boıy kezekte turady. Oblys ákimi bul máselege baılanysty «Shubarkól kómir» AQ ókilinen jaýap surady.
- Biz kómirimizdi kelisimshart jasasqan mekemelerge bir tonnasyn 4 502 teńgeden, qosymsha salyq qunysyz satamyz. 8500 teńge - ol deldal satýshylar bolar. Ony jergilikti jerde sheshý kerek. Biz kelisimsharty bar tutynýshylarǵa satamyz, - dep túsindirdi satý bóliminiń bastyǵy Nına Gornıakova.
Erlan Qoshanov basqa da kómir ónerkásipteriniń ókilderimen áńgimelesti. Berilgen jaýaptarǵa súıensek, baǵa 3000 teńgeden 8000 teńge aralyǵynda bolyp otyr.
Aımaq basshysy óziniń orynbasarlaryna qysqa merzimde qatty otynnyń baǵasyn qalyptastyrýǵa baılanysty máseleni sheshýdi tapsyrdy.
