Qaraǵandy oblysynyń ákimi karantın shekteýin buzǵandardy qatań qadaǵalaýdy talap etti
QARAǴANDY. QazAqparat - Qaraǵandy oblysynyń ákimi Jeńis Qasymbek karantın kezindegi úılený toıy men jappaı merekelerge qatysty pikir bildirdi, dep habarlaıdy QazAqparat tilshisi.
«Kóktemnen bastap túrli buqaralyq is-sharalarǵa tyıym salynǵan. Degenmen, keıbir zaldar úılený toıyn, mereıtoılardy jáne basqa da jappaı is-sharalardy tyıymdarǵa qaramastan jalǵastyrýda. Tártip buzýshylarǵa úlken aıyppul salynady. Biraq bul olarǵa kedergi bolmaı turǵan syńaıly. Jaqynda júzden astam adam qatysqan úılený toıy ótkeni týraly málimet tirkeldi. Keshe áleýmettik jelide 200-den astam jas jınalǵan túngi klýbtyń jumysy týraly aqparat jarııalandy», - dedi Jeńis Qasymbek onlaın rejımdegi apparattyq keńeste.
Oblys ákimi polıtsııa men jergilikti ákimdikter tarapynan baqylaý álsiz dep sanaıdy.
«Bloger atalmysh túngi klýb karantın jarııalanǵannan beri jumysyn toqtatqan emes deıdi. Meniń quqyq qorǵaý organdaryna, ákimdikke qoıatyn suraǵym: buǵan qalaı jol berilgen? Bul oryndar belgili bolsa da, olar jabylmaıdy. Muny nemquraıdylyq dep sanaýǵa bolady», - dedi Jeńis Qasymbek.
Ol ár jaǵdaıdy sheshýdi jáne kún saıyn ereje buzýshylarmen jumys týraly esep berýdi talap etti.
Oblys ákimi turǵyndardy shydamdylyq tanytyp, kópshilik jınalatyn jerlerden aýlaq bolýǵa shaqyrdy.
«Mereke, úılený toıy, mereıtoılar kúte turady. Týystaryńyz ben jaqyndaryńyzdyń ómiri men densaýlyǵy mańyzdy», - dep atap ótti Jeńis Qasymbek.
