Qaraǵandy oblysynyń ákimi Qaraǵaıly aýylyn qalpyna keltirýdi óz baqylaýyna aldy
ASTANA. QazAqparat - Qaraǵandy oblysynyń ákimi Erlan Qoshanov úsh aıda atqarylǵan jumystardyń nátıjesin kórý úshin Qarqaraly aýdanynyń Qaraǵaıly aýylynda boldy. Eske salsaq, aǵymdaǵy jyldyń mamyr aıynda aımaq basshysy Qarqaraly aýdanynyń birneshe kásipornynda, onyń ishinde Qaraǵaılydaǵy ken-baıytý fabrıkasynda boldy. Erlan Qoshanov turǵyndarmen kezdesip, aýyldyń ózekti máselelerimen tanysqan edi, olar úıilgen turmystyq qoqysqa, jaısyz joldar men taza aýyz sýdyń tapshylyǵyna shaǵymdandy.
Úsh aıǵa jýyq ýaqyt ótken soń ákim atalmysh máselelerdiń qalaı shishilip jatqandyǵyn tekserip qaıtty. Qaraǵaıly turǵyndarymen kezdesýde Qarqaraly aýdanynyń basshysy Hálel Maqsutov búginde qandaı jumystar atqarylǵandyǵyn baıandady.
«Qaraǵaıly ken-baıytý fabrıkasy, «Baıbatyr» JShS men «Qarmys» jáne «Aslan» sharýashylyq qojalyqtarynyń jáne de aýdan bıýdjeti esebinen ári turǵyndardyń kómegimen osy aralyqta aýyldan 11060 tonna qurylys qaldyqtary shaǵaryldy. Tamyz aıynyń sońyna deıin taǵy 1500 tonna qoqysty shyǵarý josparlanýda. Alaıda taǵy 7000 tonna qaldyq qalady, ony kelesi jyly shyǵarý kózdelip otyr», - dedi Hálel Maqsutov.
Sonymen qatar aýylda bos turǵan kópqabatty úsh turǵyn úıge 52 tereze salynǵan. JJS aýmaǵy men «Samal» ǵımaraty abattandyrylǵan. Jol boıyndaǵy 20 konteıner qalypqa keltirilgen. Jáne de aýylda 380 qorshaý, 5 bılbord ornatylǵan, oıyn aýlalary men 6 avtobýs aıaldamalary jabdyqtalǵan. Taǵy 30 konteıner satyp alý úshin bıýdjetten 1,5 mln teńge suraldy. «Qazaqmas Korporatsııasy» aýyl turǵyndaryna syıymdylyǵy 200 kelilik qoqys shyǵaratyn qurylǵyny alyp berýge ýáde etti. 
Sondaı-aq aýyz sý máselesi de sóz boldy. Búgingi tańda «Baldyrǵan» balabaqshasyna deıin 280 metr sý qubyry ótkizilgen. Al uzyndyǵy 3,3 shaqyrymdyq aýylishilik sý júıesin almastyrý úshin aýdan bıýdjetinen 7,7 mln teńge bólingen. Jalpy sý qubyry jáne káriz júıelerin qurý boıynsha jobalyq qujattardy daıarlaý úshin oblystyq bıýdjetten 67,5 mln teńge suralǵan. Onyń qorytyndysy 19 tamyzda belgili bolady.
Aýyldaǵy joldarǵa keler bolsaq, eki jarym aıda 4 mln teńgege 23 shaǵynaýdanda jol ústindegi oıyqtardy jabý jumystary jasalyp, Tóleýbaev kóshesi men 13-inshi jáne 18-shaǵynaýdandarda usaq tas tóselgen. Joldardyń ortasha jóndeý jumystary úshin oblystyq bıýdjetten 87,3 mln teńge bólinip, búginge konkýrs ótkizildi. «MRIıA-NS» merdiger uıymy jumystardy bıylǵy jyldyń 1 qazanyna deıin bitirýge ýáde berip otyr.
Sonymen qatar kóshelerdi abattandyrý jáne jaryqtandyrý jumystary jasalǵan. 2018 jylǵa baǵasy 229,3 mln teńgelik 25 orynǵa arnalǵan dárigerlik-ambýlatorııalyq keshen qurylysy josparlanýda.
Aýdan ákiminiń esebin tyńdaǵan soń aımaq basshysy Erlan Qoshanov turǵyndardyń saýaldaryna jaýap berdi.
«Eki jarym aı buryn ýáde etkendeı, men búgin sizderge keldim. Ózderińiz kórip otyrǵandaı nátıje bar, jumystar atqarylyp jatyr. Múmkin keı jaǵdaılarda baıaý júrip jatqan bolar, biraq onyń sebebi, keı jumystar úshin ýaqyt qajet. Sizderden sabyrlyq saqtaýdy suraımyn. Óz aýylyn abattandyryp, damytýǵa aýyl turǵyndary da úle qossa eken deımin. Biz resýrstyq ortalyq úshin ǵımarat bere alamyz, al ony ary qaraı damytý ol sizderdiń enshilerińizde. Biz sizdergen qoldan kelgenshe kómektesemiz», -dedi oblys ákimi.
