Qaraǵandy oblysynyń ákimi eki kúnde máselemen kelgen 16 turǵyndy qabyldady
ASTANA. QazAqparat - Qaraǵandy oblysynyń ákimi Erlan Qoshanov azamattardy qabyldaý ótkizdi. Eki kúnde aımaq basshysyna túrli máselelermen 16 adam jolyqqan, dep habarlaıdy oblys ákiminiń baspasóz qyzmeti.
«Ótinishterdiń bir bóligi jumysqa ornalastyrý, baspana berý máselelerine baılanysty boldy. Kásipkerler oblys ákimine shaǵyn jáne orta bıznesti damytýǵa, agroónerkásiptik keshendi damytý boıynsha suraqtar qoıdy», - delingen habarlamada.
Buqar jyraý aýdany Tuzdy aýylynyń fermeri Rahat Muhamedıarov jaıylym jer bólýdi surady. Budan basqa, daýly jerlerge, mal ósirý boıynsha ınvestıtsııalarǵa qatysty saýaldar qoıyldy.
Temirtaýlyq kásipker Natalıa Lýgına jańa tehnologııa boıynsha óndiriste qıyndyqtar týyndaǵan soń oblys ákiminen kómek suraı kelgen.
«Kúıeýim ekeýimiz kedeı ken oryndaryn qurǵaq jolmen baıytý tehnologııasyn ázirledik. Patent aldyq. Marganets keninen bastadyq, búginde kez kelgen metall kenin, qaldyqtardy baıytýǵa qabiletimiz bar. Qarajalda óndiristi iske qostyq. Shyǵarylǵan ónimge qatysty tutynýshylarymyz jaqsy pikirlerin bildirip jatyr. Byltyr óndiristi keńeıtýge grantqa ıe boldyq. Jabdyqtar satyp alyp, ony Temirtaýda ornattyq. Biraq shıkizat bazasymen qıyndyqtar týyndap otyr. Ken alyp turǵan úıindini baıytýmen aınalyspaıtyn fırmaǵa berip qoıdy», - deıdi Natalıa Lýgına.
Óndiriske bos úıindi kerek. Erlan Qoshanov qaramaǵyndaǵylarǵa zań aıasynda bul jaǵdaıdyń sheshimin tabýdy tapsyrdy.
Qabyldaý barysynda áleýmettik máseleler de kóterildi. «Otan qorǵaýshylar» qoǵamdyq birlestiginiń basshysy Ábildá Ábdikárimov oblys ákimimen Chernobyl AES-indegi apatty joıýshylardy qoldaý máselesin talqylady. «Ardager-2012» QB basshysy Baqtybaı Esendáýletov ardagerler uıymdarynyń jumysy týraly baıandady.
Balqash turǵyny Mahmut Jarylǵap oblys ákimine № 15 lıtseıge Álıhan Bókeıhannyń esimin berýdi usyndy.
Árbir jaǵdaı egjeı-tegjeıli talqylandy. Problemalyq máseleler boıynsha sheshim qabyldaý úshin jumystar júrgiziledi.
