Qaraǵandy oblysynyń ákimi dybystyq jarnamany qatty qoıatyn kompanııalarmen kúresýde
QARAǴANDY. QazAqparat - Qaraǵandy oblysynyń ákimi Erlan Qoshanov retsiz saýda men dybystyq jarnamalardy tártipke keltirýdi talap etti. Bul másele apparat jınalysy barysynda talqylandy, dep habarlaıdy QazAqparat aımaq ákimdigine silteme jasap.
Aımaq basshysy qol astyndaǵy qyzmetkerler naqty áreketter jasap, qala turǵyndaryn qorǵaý úshin jetkilikti áreketter jasamaı jatqanyna narazylyǵyn bildirdi. Turǵyndar shaǵym aıtýyn toqtatar emes, al másele sol kúıi sheshilýsiz qalyp otyr.
Oblys ákiminiń blogyna jyl basynan beri Qaraǵandy qalasy, Prıshahtınsk shaǵyn aýdanyndaǵy Zelınskıı kóshesindegi retsiz saýdaǵa qatysty 17 shaǵym kelip túsken. Qala ákimi Nurlan Áýbákirov «suraq túsinikti» dedi.
«Eger suraq túsinikti bolsa, tártipke keltirińizder», - dep talap etti Erlan Qoshanov.
Osy sekildi problema - qala ortalyǵyndaǵy dybystyq jarnamalar. Qala basshylyǵy quqyqtyq olqylyqtarǵa siltep otyr. Olardyń aıtýynsha, abattandyrý erejelerin ózgertý qajet. Bul jaǵdaıǵa Qoǵamdyq densaýlyq qorǵaý basqarmasy sáıkesinshe ólshemder jasap, yqpal ete alady. Biraq mundaı jaýap oblys ákiminiń kóńilinen shyqqan joq.
«Osydan bir aı buryn detsıbelderdi ólsheımiz dep ýáde bergen bolatynsyzdar. Adamdarǵa kedergi jasap jatyr. Nátıjeli sharalar qoldanýǵa bolmas pa edi? Ol nebári 5-6 oryn emes pe? Sizder olardyń ıeleriniń barlyǵyn bilesizder. Shaqyryńyzdar, áńgimelesińizder, bul máseleni sońyna deıin sheshińizder», - dedi oblys basshysy.
Erlan Qoshanov jergilikti polıtsııaǵa da bul máselege kirisýdi tapsyrdy.
