Qaraǵandy oblysynyń ákimi Buqar jyraý aýdanyndaǵy sý tasqynyna qarsy daıyndyqty tekserdi
ASTANA. QazAqparat - Qaraǵandy oblysynyń ákimi qyzmetine taǵaıyndalǵan Erlan Qoshanov alǵashqy jumys saparyn Buqar jyraý aýdanyna jasady. Aımaq basshysy sý tasqynyna qarsy daıyndyqty tekserdi, dep habarlaıdy oblystyq ákimdiktiń baspasóz qyzmeti.
Erlan Qoshanov Kókpekti bógetinde boldy. Oblys ákimi Baıqadam aýylynda qar jınaý jáne shyǵarý, Petrovskıı aýyldyq okrýgynda Nura ózeniniń boıyndaǵy taldardy shabý jumystarymen tanysty. Botaqorada aımaq basshysy oblystyq TJD basshysynyń esebin tyńdady.
Buqar jyraý aýdanynda Nura ózeniniń boıynda ornalasqan 15 eldi mekendi sý basý qaýpi bar. Halyqty, aýmaqty jáne sharýashylyq sýbektilerdi tasqyn sýlardan qorǵaý jónindegi 2017 jylǵa arnalǵan aýdandyq jospar ázirlendi jáne oryndalýda. Aýdandyq jedel shtab quryldy.
«Tabıǵı jáne tehnogendik sıpattaǵy TJ-nyń aldyn alýǵa jáne joıýǵa 2017 jylǵa arnalǵan aýdandyq bıýdjette 34,5 mln. teńge qarastyrylǵan. Qazirgi kezde rezervti qordan eldi mekenderde qar shyǵarý jáne kóshelerdi tazalaý jumystaryna 10,5 mln. teńge bólindi. Sonymen qatar, Ǵ. Mustafın, Botaqora eldi mekenderinde jáne Sarytóbe aýylynda bógetter ornatý úshin 13 mln. teńge bólindi. Qazirgi kezde tıisti jumystar júrgizilýde. 385 birlik mamandandyrylǵan tehnıka jáne 800-den asa adam tartylǵan», - dep habarlady Buqar jyraý aýdany ákiminiń orynbasary Sapar Sataev.
Aýdandaǵy 24 eldi mekende jergilikti habarlandyrý júıeleri ornatylǵan. Aýdanda 14 myńnan asa adamdy qabyldaıtyn 76 evakýatsııalyq pýnkt bar. Jergilikti ákimdikterdiń málimetinshe, 1500 tonna ınerttik materıal daıyndalady. Sý ótkizetin qubyrlar men qudyqtardy, aryqtardy tazartý jumystary qolǵa alyndy. Botaqora eldi mekeninde jáne Doskeı aýylynda qosymsha bes sý ótkizý joldary jasalady. Bıyl 2015 jyly sý tasqynymen buzylǵan kópirdiń ornyna «Qaraǵandy-Toǵyzqudyq-Botaqora» jolynda jańa kópirdiń qurylysy bastalady.
«Jobalaý-smetalyq qujattama bar. Tórt jolaqty kópirdiń jobasy jasaldy. Uzyndyǵy 132 metr, bir metrge bıikteý bolady. 2017 godý jańa kópirdiń qurylysyna 540 mln. teńge bólindi. Konkýrstyq protsedýralar júrip jatyr. Jumystardy sáýir aıynyń ortasynda bastaý josparlanǵan. Obekt 2018 jylǵa aýysady», - dep baıandady oblystyq Jolaýshylar kóligi jáne avtomobıl joldary basqarmasynyń basshysy Abaı Sanaýbarov aımaq ákimine. Aýdanda Nura ózeniniń boıyndaǵy, seń júrý kezinde kedergi keltirmes úshin taldardy shabý jumystary júrgizilýde. Sondaı-aq, ózenniń arnasy túzetý josparlanǵan. Qazgıdromettiń habarlaýynsha, oblysta ózenderde sý tasqyny naýryz aıynyń sońynan sáýir aıynyń ortasyna deıin bolady dep kútilýde. «3 naýryzdan bastap oblystyq azamattyq qorǵaý aýmaqtyq ishki júıesi joǵary daıyndyq rejımine kóshti. Barlyq jerde sý tasqynyna qarsy shtabtar quryldy. Kún saıyn sý tasqyny jaǵdaıy boıynsha aqparat jınalady. Ǵaryshtyq monıtorıng júrgiziledi, táýligine eki ret ǵaryshtan túsirilgen sýretterdi alamyz. Oblysta qar jatyr. Ózen-kólder áli qystyq rejımde», - deıdi Qaraǵandy oblysynyń TJD bastyǵy Ibragım Kúlshibaev.
Oblystaǵy negizgi sý qoımalarynda sý aǵyzý jumystary jalǵasýda. Mamandardyń aıtýynsha, deńgeı erigen qar sýlaryn qabyldaýǵa daıyn. Esepterge sákes, oblystyń eldi mekenderinen myń tekshe metrden astam qar shyǵarylǵan. Erlan Qoshanov aldaǵy ýaqytta sý tasqynyna qatysty ahýalmen tanysý maqsatynda óńir aýmaǵyn tikushaqpen sholyp shyǵýdy tapsyrdy. Osydan keıin oblystyq shtabtyń otyrysy ótkiziledi.
