Qaraǵandy oblysynyń ákimi balalar alańdaryn tekserýdi tapsyrdy
«Kún saıyn balalar alańdarynyń sapasy boıynsha kóptegen habarlamalar men shaǵymdar alamyn. Barlyq qalalar men aýdandardaǵy aýla alańdaryn tekserý qajet. Balalardyń jaraqat alý qaýpin barynsha boldyrmaý úshin jóndeý jumystaryn júrgizý kerek», – dedi Jeńis Qasymbek onlaın rejımindegi apparat keńesinde.
Balalardyń quqyqtaryn qorǵaý jáne qaýipsizdigin qamtamasyz etý boıynsha júrgizilip jatqan jumystar týraly bilim basqarmasynyń basshysy Gúlsim Qojahmetova men polıtsııa departamentiniń jergilikti polıtsııa qyzmetiniń bastyǵy Qýanysh Zarýbaev baıandady.
Óńirde vedomstvoaralyq jol kartasy júzege asyrylýda.
«Bilim basqarmasymen birlesip, jazǵy demalys kezinde kámeletke tolmaǵandar arasyndaǵy quqyq buzýshylyqtardyń aldyn alý boıynsha qosymsha is-sharalar jospary ázirlendi. Qoǵamdyq tártipti saqtaýǵa jáne balalardyń demalys lagerlerinde aldyn alý jumystaryna erekshe nazar aýdarylatyn bolady. Túngi ýaqytta kóńil kóterý oryndary boıynsha, jastardyń súıikti jınalatyn oryndary – saıabaqtarda, gúlzarlarda, alleıalarda reıdter jalǵasady. Sondaı-aq, patrýl narıadtary qalalyq jaǵajaılar, sý aıdyndary jáne azamattardyń basqa da kópshilik demalatyn oryndary janynda kezekshilik etedi», – dep habarlady Qýanysh Zarýbaev.
Onyń aıtýynsha, mamyr aıynda otbasylardy aralaý bastaldy, balalardy ógeı ákesi tárbıelep jatqan otbasylar tekseriledi. Polıtsııa jaısyz otbasylarmen jáne jasóspirimdermen jumys isteý ádisterin qosymsha oqydy.
Mektepter men kolledjderdegi qaýipsizdik komandalary týraly Gúlsim Qojahmetova aıtyp berdi. Bilimal avtomattandyrylǵan júıesinde «Áleýmettik pedagog» modýli quryldy. Óńirde balalar qaýipsizdigi boıynsha 70 mektep bapkeri daıarlandy. Jol kartasynyń bir baǵyty – býllıng pen kıberbýllıngtiń aldyn alý.
«Resmı túrde, statıstıka boıynsha kámeletke tolmaǵandarǵa qatysty qylmys deńgeıi tómendeıdi (32,5%-ǵa). Buǵan, árıne, barlyq múddeli organdar júrgizetin jumys yqpal etedi. Biraq túbegeıli jetistikter týraly aıtýǵa áli erte. Balalardy jazataıym oqıǵalardan qorǵaý úshin aldyn alý sharalary men túsindirý jumystaryn kúsheıtý qajet. Másele balalardyń ómiri men densaýlyǵyna qatysty, sondyqtan bul jumysty turaqty baqylaýda ustaımyz», – dep atap ótti Jeńis Qasymbek.