Qaraǵandy oblysynyń ákimi baǵanyń negizsiz kóterilýine jol bermeýdi tapsyrdy

QARAǴANDY. QazAqparat – Qaraǵandy oblysynda azyq-túlik tapshylyǵy joq, JJM qory jetkilikti. Óńir basshysy Jeńis Qasymbek baǵanyń negizsiz kóterilýine jol bermeýdi jáne kúndelikti monıtorıng júrgizýdi tapsyrdy, dep habarlaıdy QazAqparat tilshisi.

«Áleýmettik mańyzy bar azyq-túlik taýarlarynyń barlyq túrleri boıynsha baǵanyń negizsiz ósýine jol bermeý boıynsha jumysty jalǵastyrý qajet», - dep Jeńis Qasymbek apparattyq keńeste qalalar men aýdandardyń ákimderine, oblystyq basqarmalardyń basshylaryna

tapsyrma berdi.

Oblys turǵyndary azyq-túlik, janar-jaǵarmaı jáne avtokólikke arnalǵan gaz baǵasyn kóterý faktileri týraly Senim109 qyzmetine habarlaı alady. Operatorlar 109 qysqa nómiri boıynsha dúkender men janarmaı quıý beketteriniń ataýlary men meken-jaılaryn kórsete otyryp, ótinishterdi qabyldaıdy. Qalalyq jáne uıaly telefondardan qońyraý shalýǵa bolady. Barlyq shaǵymdar Quzyretti qyzmetterge shara qoldaný úshin jiberiledi. Óńirdegi ahýal, TJ rejımi boıynsha kez kelgen basqa da máseleler boıynsha suraqtar qabyldanady.

Sondaı-aq keńeste bankterdiń jumysy boıynsha jaǵdaı týraly Ulttyq banktiń Qaraǵandy

fılıalynyń dırektory Ǵazız Shegenov baıandady.

Onyń aıtýynsha, Qaraǵandy oblysynda qolma-qol aqshany bankomattar men bank bólimshelerinen alýǵa bolady. Sondaı-aq, «Kaspıı» jáne «Halyq» bankteriniń mobıldi

qosymshalary arqyly qolma-qol aqshasyz esep aıyrysýlar júrgiziledi.

«Osy demalys kúnderi ekinshi deńgeıli bankter otandyq valıýtamen tolyqtyryldy.

Bankomattarǵa qolma-qol aqsha júkteldi. Bankter burynǵy jumys yrǵaǵyna oralady. Kaspıı banki men Halyq bankiniń mobıldik qosymshalary jumys istep tur», - dedi fılıal basshysy.