Qaraǵandy oblysynyń ákimi aı saıyn qansha jalaqy alatynyn aıtty
QARAǴANDY. QazAqparat - Qaraǵandy oblysynyń ákimi Erlan Qoshanovtyń aılyq aqysy QR Úkimetiniń saıası memlekettik qyzmetkerlerdiń jalaqysyn esepteý týraly qaýlysyna saı esepteledi, dep habarlaıdy QazAqparat oblys ákiminiń baspasóz qyzmetine silteme jasap.
«Jalaqy taǵaıyndaǵan kezde memlekettik qyzmettegi eńbek ótili de eskeriledi. Aımaq basshysynyń eńbek stajy 20 jyldan asady. Eńbek ótilin esepke alǵanda, aıyna 967 myń 672 teńge shyǵady. Mindetti salyqtyq shegerýler men aýdarymdardy eseptegende, qolyna 786 myń 642 teńge alady» delingen habarlamada.
Sonymen qatar, aımaq basshysy ózine qosymsha tólemder men syıaqylar jazbaıtynyn jáne almaıtynyn málimdedi. Apparat qyzmetkerleri jáne basqa da memlekettik qyzmetkerler qarajattyń únemdelýi esebinen syıaqy alady.
«Adam jaqsy jumys istese, mundaı artyqshylyqtar berip otyrǵandy quptaımyn», - dedi Erlan Qoshanov.
Oblys ákimine jalaqysy jete me jáne ony qaıda jumsaıdy? Ákimniń jumysbastylyǵyna baılanysty, otbasylyq bıýdjetpen aınalysýǵa ýaqyty joq. Ol qarajatty jubaıy basqaratynyn jetkizdi.
«Kóp otbasylardaǵydaı, tabysymyz negizinen azyq-túlikke, kommýnaldyq qyzmetterdi tóleýge, úıge qajetti zattar, kıim alýǵa jumsalady. Qajet bolǵan jaǵdaıda emdelýge ketedi»,- dep túıindedi sózin Erlan Qoshanov.
Sondaı-aq, Erlan Qoshanov «jalaqy az ba, álde kóp pe?» degen suraqqa da jaýap berdi.
«Maǵan jalaqyny memleket taǵaıyndaıdy jáne tóleıdi. Esepteýler zańnamalyq normaǵa saı júrgiziledi. Sondyqtan, az nemese kóp alam dep, jeke pikirimdi bildirý ádepsizdik bolar. Eger men jekemenshik sektorda jumys istesem, ol jerde men jumys berýshige óz pikirimdi jáne pozıtsııamdy aıta alar edim. Alaıda, memlekettik qyzmetker bolǵandyqtan, munda, taǵy qaıtalap aıtaıyn, óz jeke pikirimdi ortaǵa salý ádepsizdik bolady. Maǵan jáne meniń jumysyma baǵany Prezıdent pen oblys turǵyndary beredi», - dep atap ótti ákim.
