Qaraǵandy oblysynyń ákimi «ArselorMıttal Temirtaýǵa» qatysty narazylyǵyn bildirdi

«ArselorMıttal Temirtaý» bolat óndirisin jylyna 6 mln tonnaǵa deıin ulǵaıtý týraly ýádesin nege oryndamady? Metallýrgter qalasynyń turǵyndary qashan taza aýamen demala alady? Qaraǵandy oblysynyń ákimi Jeńis Qasymbek kompanııa basshylyǵyna osyndaı suraqtardy tótesinen qoıdy.

«Sizder el basshylyǵyna jylyna 6 mln tonna bolat óndirýge ýáde berdińizder. Bul sizderdiń ınvestıtsııalyq kelisimshartyńyzda jazylǵan. Іs júzinde, nátıje bir jarym ese az – osy jyldyń qorytyndysy boıynsha 3,7 mln tonna bolat kútilýde. Kólem boıynsha ósip jatqan joqsyzdar! Ótken jylmen salystyrǵanda prokat óndirisi 20%-ǵa tómendedi», - dep Jeńis Qasymbek Temirtaýdyń damý áleýetin talqylaý jónindegi keńeste kompanııanyń atyna narazylyǵyn bildirdi.

«ArselorMıttal Temirtaý» AQ atqarýshy dırektory Vadım Basınniń aıtýynsha, ınvestıtsııalyq baǵdarlama 5 mln tonnaǵa deıin túzetildi. Top-menedjer jol kartasy týraly eske saldy, onda kompanııa úsh jyl ishinde óndiristi jańǵyrtýǵa 305 mlrd teńge salýdy mindettedi.

«Biz ınvestıtsııalardyń 70%-yn sizder ıgergenderińizdi bilemiz. Jyl saıyn 100-105 mlrd teńge salasyzdar. Óndiris kólemin arttyrý, memleket aldyndaǵy mindettemelerdi oryndaý úshin bul jetkiliksiz ekenin kórip otyrmyz. Biz kásiporynnyń damý strategııasyn túsingimiz keledi, eki jyldan keıin, bes jyldan keıin qansha adam jumys isteıtin bolady. Jáne qalany, ınjenerlik, áleýmettik ınfraqurylymdy damytý boıynsha óz josparlaryn sáıkestendirý kerek», - dedi Jeńis Qasymbek.

Óńir basshysy jergilikti shaǵyn jáne orta bıznesti qoldaý boıynsha da kompanııaǵa syn aıtty. Taýarlar satyp alýǵa jumsalǵan 32 mlrd teńgeniń 900 mln teńgesi ǵana qaraǵandylyq ónim óndirýshiler úlesine tıesili – ol barlyq joǵy 3%. Oblys ákimi bul kórsetkish óte az ekenin atap ótti.

«Jumystar men qyzmetter boıynsha da jaǵdaı osyǵan uqsas. 45 mlrd teńgeniń ishinde qazaqstandyq kompanııalardyń úlesi 30% ǵana quraıdy. Bul rette óńirdiń shaǵyn jáne orta bıznesi ónimniń úlken assortımentin usynatynyn eskersek. Biz barlyǵymyz patrıottarmyz! Qazaqstandyq úlesti arttyraıyq», - dedi Jeńis Qasymbek.

Oblys ákimi jaqyn arada qalada shaǵyn jáne orta bıznesti damytý boıynsha birlesken keńes ótkizýdi tapsyrdy.

Óńir basshysy kombınattaǵy apattyq ǵımarattar men qurylystarǵa qatysty máselelerdi de qozǵady. Bul óndiristegi iri apattarǵa ákeledi, dep atap ótti ol.

«Qabyldanyp jatqan sharalarǵa qaramastan, Temirtaýdaǵy ekologııalyq jaǵdaı shıelenisip tur. Sizder kóp aqsha salǵanyn baıandaısyz. Biraq adamdar nátıje men naqty jaqsartýlardy kórmeıdi», - dedi Jeńis Qasymbek.

Oblys ákimi sondaı-aq JEO-2-degi uzaqqa sozylǵan jańǵyrtý jóninde da aıtty. Óńir basshysy jobany júzege asyrýdy tezdetýdi talap etti.