Qaraǵandy oblysynyń ákimdiginde kásipkerlerdiń máseleleri talqylandy
QARAǴANDY. QazAqparat - Qaraǵandy oblysynyń ákimdiginde aımaq basshysy Erlan Qoshanovtyń tóraǵalyǵymen kásipkerlik máselelerine qatysty jınalys ótti.
Bıznesmender atqarýshy bılik organdary sheshimin tabýǵa kómektese alatyn ózekti máselelerdi ortaǵa saldy, dep habarlaıdy óńir ákimdiginiń resmı saıty.
Kezdesý barysynda talqylanǵan eń basty problemalardyń biri aýylsharýashylyq kooperatıvterdiń kommýnıkatsııalarǵa qosylýy múmkin bolmaı turǵany boldy. Zań boıynsha bul múmkindikti jergilikti atqarý bılik organdary jasaýy tıis, alaıda osy ýaqytqa deıin elektr qýatymen jáne kárizben barlyq kooperatıvter qamtamasyz etilmegen.
Dálirek aıtar bolsaq, Shet aýdanynda 11 aýylsharýashylyq kooperatıvteriniń 4-de jelilerge qosylýǵa qatysty problemalary bar.
Bul másele jergilikti ákimniń baqylaýynda. Al Nura aýdanynda ákim Nıqanbaı Omarhanovtyń aıtýynsha, bul másele sheshimin tapqan.
Sonymen qatar jınalysta kásipkerler jer aýktsıondarynyń merzimdiligi taqyrybyn qozǵady. Seriktes qalalar men aýyldyq aýdandarda jer telimin tek saýdaǵa qatysyp qana alýǵa bolady, alaıda saýda ótkizilmeıdi. Bul máselege qatysty kásipkerler ásirese Shahtınsk basshylyǵyna renishterin bildirdi. Onda 2017 jyly birde bir saýda júrgizilmegen eken.
- Biz jer telimderin bermeýimizdiń sebebi - aýktsıondar ótkizýge qarajat qarastyrylmaǵan. Bıylǵy jyly 27 jer bólikterin saýdalaımyz dep josparlap otyrmyz, bul maqsatqa 5 mıllıon teńge qarastyryldy, - dep málim etti Shahtınsk ákimi Serjan Aımaqov.
Jaǵdaıdy jaqsartý úshin kásipkerler is júzindegi bos jer telimderiniń elektrondyq kartasyn jetildirýdi usyndy. Olardyń pikirinshe, málimetterdi ýaqtyly jańartyp otyrý kerek, sondaı-aq tizimge derekterdi tolyǵyraq qosý qajet. Bul jaǵdaıda áleýetti satyp alýshyda aldyn ala jer teliminiń sıpattamasymen tanysyp alýǵa múmkindigi bolady.
Erlan Qoshanov qala jáne aýdan ákimderine jınalys barysynda ortaǵa salynǵan osy jáne basqa da máselelerdi sheshý joldaryn tabýdy jáne olardy jaqyn ýaqytta kórsetýdi tapsyrdy.
