Qaraǵandy oblysynyń ákimdigi sý tasqynyna daıyndyqty pysyqtady
«Qazgıdromettiń málimetinshe, oblys boıynsha jerdiń tońy 61-den 150 sm-ge deıin quraıdy. Samarqan jáne Yntymaq sekildi iri sý qoımalarynan sanıtarlyq sý aǵyzý júrgizilýde. Qazirgi ýaqytta óńirde 69 shaqyrym aryq pen 123 shaqyrym arna tazalandy. Sý tasqynyna daıyndyq kúndelikti baqylaýda», - dep málim etti TJD basshysy Murat Qatpanov.
Naýryz aıynyń basynda «Kóktem-2021» oqý-jattyǵýy ótti. Murat Katpanovtyń aıtýynsha, bul joly barlyq kúsh-jiger tájirıbelik sabaqtarǵa baǵyttalǵan. 6 myń metrge jýyq aryq, arnalar, 280 sý ótkizý qubyry tazartylyp, 27 myń tekshe metrden astam qar shyǵaryldy jáne 2 myń metr transheıa tóseldi.
Vedomstvolyq mobıldik toptar Qarqaraly, Buqar Jyraý aýdandary men Temirtaý qalasynyń aýyldaryn tekserdi. 11 eldi mekenniń basshylaryna sý tasqynyna daıyndyqtyń jetkiliksizdigi týraly eskertildi.
Jergilikti mańyzy bar 69 jol ýchaskesi erekshe baqylaýǵa alyndy. Materıaldyq-tehnıkalyq quraldar men ınertti materıaldar qoryna tekserý júrgizildi. Halyq úshin arnaıy usynystar ázirlendi.
15 naýryzdan bastap barlyq sý tasqynyna qarsy shtabtar táýlik boıy jumys isteıtin bolady.
Oblystyń qalalary men aýdandarynyń basshylary TJD qyzmetkerlerimen birge asa qaýipti sý tasqyny ýchaskelerin aralaýdy jalǵastyrýda.
Oblys ákimi sý tasqyny kezeńine daıyndyq úshin árbir qyzmettiń jaýapkershiligin eske saldy.
«Negizgi mindet - azamattardyń qaýipsizdigin, sharýashylyq júrgizýshi sýbektilerdiń, tirshilikti qamtamasyz etý obektileriniń, kólik ınfraqurylymynyń aýmaqtaryn qorǵaýdy qamtamasyz etý bolyp tabylady. Sońǵy 3-4 jylda úlken jumys júrgizildi, biraq barlyq problemalar áli sheshilgen joq, sondyqtan daıyndyq erekshe bolýy tıis», - dep atap ótti Jeńis Qasymbek.
