Qaraǵandy oblysynyń ákimdigi shahterlerge qatysty túsinikteme berdi
ASTANA. QazAqparat - Qaraǵandy oblysy ákimdigi «ArselorMıttal Temirtaý» AQ kómir departamentindegi jaǵdaıǵa qatysty túsinikteme berdi, dep habarlaıdy QazAqparat.
Oblys ákimi baspasóz qyzmetiniń málimetinshe, 2017-shi jyldyń 11-shi jeltoqsanynda «ArselorMıttal Temirtaý» AQ Kómir departamentiniń tórt shahtasynyń jumyskerler toby aýysym aıaqtalǵan soń jumys oryndarynan ketýden bas tartqan.
Kompanııa basshylyǵy men jumyskerlerdiń múddesin ortaǵa salatyn «Qorǵaý» kómir kenshileri kásipodaǵynyń arasynda eńbek zańnamasy sheńberinde kelissóz bastaldy.
«Jaǵdaı Qaraǵandy oblysy ákimdiginiń baqylaýynda. Basqa shahtalar shtattyq rejımde jumystaryn jalǵastyryp jatyr», delingen habarlamada.
