Qaraǵandy oblysynyń Abaı aýdanynda jyl sońyna deıin 200-den astam páter tapsyrylady
ABAI. QazAqparat – Qaraǵandy oblysynyń ákimi Jeńis Qasymbekke jumys sapary barysynda Abaı aýdanynyń turǵyn úı qurylysy, joldardy jóndeý, sý qubyry jáne káriz jelileri men sorǵy stantsııalaryn qaıta jańǵyrtý josparlary týraly baıandaldy, dep habalaıdy QazAqparat tilshisi.
Búgingi tańda Abaı qalasynda 160 páterlik jalǵa beriletin jáne nesıe túrindegi eki úıdiń qurylysy belsendi qarqynmen júrgizilýde. Sonymen qatar, jeke qarajatqa 90-shy jyldary aıaqtalmaǵan 70 páterli úıdi qalpyna keltirý josparlanýda.
«Búginde biz tek Abaıda ǵana emes, Toparda da úılerdi turǵyzýdamyz. Jaqynda 18 páterlik úıdi jalǵa beremiz. Ol jerde Keńes Odaǵy ydyraǵannan keıin qurylys júrgizilgen emes. Jyl qorytyndysy boıynsha 248 adamdy turǵyn úımen qamtamasyz etemiz», - dedi Abaı aýdanynyń ákimi Baýyrjan Asanov.
Abaıdyń problemalyq máseleleriniń biri - joldardyń sapasy. Aýdan ákimi qalada káriz jelilerin úsh jyldyq jańǵyrtý júrip jatqanyn málimdedi. Bıyl da jol jabynyn jóndeý jumystary bastalady. Máselen, tórt kósheni retke keltirý josparlanýda, onyń ishinde eń uzyny - Kalının kóshesi. Al «Aýyl - El besigi» baǵdarlamasy boıynsha Qarabas, Topar jáne Jumabek eldi mekenderinde aýylishilik joldar jóndeletin bolady.
Jeńis Qasymbek Abaıdyń ortalyq kóshelerimen júrip qana qoımaı, Toparda da bolyp qaıtty. Oblys ákimine ortalyq aýrýhananyń qalaı jóndelgeni kórsetildi. Sondaı-aq, aımaq basshysy P. Kornıenko atyndaǵy qosymsha bilim berý mektebine jáne ótken jyly oblystyq bıýdjet esebinen oqý korpýstary men zerthanalaryna jóndeý jumystary júrgizilgen Abaı kópsalaly kolledjinde boldy. Kolledj bazasynda «Jas maman» respýblıkalyq jobasy iske asyrylýda, sonyń arqasynda oqý orny zamanaýı aýyl sharýashylyǵy jabdyqtaryn satyp aldy. Sondaı-aq kolledjde kadrlardy daıarlaý jáne qaıta daıarlaý, quzyrettilik jáne aqparattyq tehnologııalar ortalyqtary jumys isteıdi.
Sapar qorytyndysy boıynsha Jeńis Qasymbek birqatar tapsyrma berdi.
«Jalpy aýdannyń damý qarqyny jaman emes. Barlyq qurylys jumystaryna jáne aýdan ónerkásibin odan ári ártaraptandyrý úshin jańa ınvestıtsııalar tartýǵa erekshe nazar aýdarý qajet», - dep qorytyndylady oblys basshysy.
