Qaraǵandy oblysynyń 92 aýylynda densaýlyq saqtaý nysandary salynady

QARAǴANDY. QazAqparat – Aldaǵy eki jylda Qaraǵandy oblysynyń 92 aýylynda densaýlyq saqtaý nysandaryn salý kózdelip otyr. Sonymen qatar, mamandandyrylǵan ortalyqtary bar eki aýdanaralyq aýrýhana jobasy ázirlendi, dep habarlaıdy QazAqparat tilshisi.

Medıtsınalyq kómektiń qoljetimdiligi men sapasyn arttyrý sharalary jaıynda densaýlyq saqtaý basqarmasy basshysynyń orynbasary Bıbigúl Tólegenova baıandady.

«Aýyldyq densaýlyq saqtaýdy jańǵyrtý» ulttyq jobasy aıasynda oblysta aldaǵy eki jylda 92 nysan salynady: dárigerlik ambýlatorııalar, feldsherlik-akýsherlik jáne medıtsınalyq pýnktter. FAP-tar tez turǵyzylatyn ǵımarattardyń jańa tehnologııalary boıynsha oryndalady, bul – modýldik qurylys», - dep habarlady spıker.

Bıbigúl Tólegenova sondaı-aq aýyldyq aýdandardyń turǵyndaryna qyzmet kórsetýge arnalǵan aýdanaralyq aýrýhanalardyń jobasyn usyndy.

Olardy Balqash pen Temirtaýda jumys istep turǵan kópbeıindi aýrýhanalar bazasynda qurý josparlanyp otyr.

Mamandandyrylǵan bólimshelerdi – ınsýlt, kardıologııalyq, perınataldyq ortalyqtardy, ońaltý, travmatologııa, hırýrgııa bólimshelerin jabdyqtaý kózdelgen.

Bul rette mamandandyrylǵan medıtsınalyq kómek alý úshin aýyl turǵyndaryna oblys ortalyǵyna barýdyń qajeti bolmaıdy.

Sonymen qatar, eki qala da respýblıkalyq tas jolda ornalasqan. Jol-kólik oqıǵasynan zardap shekkenderdi tezirek jetkizip, shuǵyl kómek kórsetýge bolady.

Búgingi kúni oblysta 7 ortalyq aýdandyq aýrýhana, 59 otbasylyq-dárigerlik ambýlatorııa, 40 FAP jáne 150 medıtsınalyq pýnkt aýyl turǵyndaryna medıtsınalyq kómek kórsetedi.

Medıtsınalyq uıymdarǵa kúrdeli jóndeý jáne jabdyqtardy jańǵyrtý kezeń-kezeńimen júrgizilýde. Bıyl alty FAP salý josparlanǵan.