Qaraǵandy oblysynyń 40 sport mektebinde balalar tegin jattyǵady
ASTANA. QazAqparat - Qaraǵandy óńirinde balalardy tegin qabyldaıtyn 40 sport mektebi jumys isteıdi. 2018 jyly olarǵa 29 000-nan astam bala jattyǵýǵa kelgen, dep habarlaıdy oblystyq ákimdiktiń baspasóz qyzmeti.
Mamandandyrylǵan mektepterde sporttyń 68 túri bar, onyń ishinde 40-y - olımpıadalyq sport túri.
Jyl saıyn sporttyq kıimder men quraldarǵa bólinetin qarajat kólemi ulǵaıtylýda. Eń bastysy - balalardyń oblystyq, respýblıkalyq jáne halyqaralyq saıystarǵa qatysýy qarjylandyrylady. 2018 jyly Qaraǵandy oblysynan 28000-ǵa jýyq sportshy túrli deńgeıdegi 972 saıysqa qatysqan. Ol jarystarda 8687 medal qanjylaǵan, onyń ishinde: altyn - 2831, kúmis - 2735, qola - 3121.
Óńirde 114 halyqaralyq jáne reaspýblıkalyq saıys, 42 Qazaqstan chempıonaty, 31 halyqaralyq týrnır men eki álemdik birinshilik uıymdastyryldy.
Balalar sport mektepteri tek Qaraǵandyda ǵana emes, sonymen qatar Temirtaý, Saran, Shahtınsk, Abaı, Qarajal, Balqash, Jezqazǵan qalalarynda, sondaı-aq oblystyń barlyq aýdandarynda da jumys isteıdi. Kentterde ashylatyn dene shynyqtyrý-saýyqtyrý keshenderi jattyǵýlar ótkizetin bazaǵa aınalyp otyr.
Ótken jyldan bastap «Tsıfrlyq Qazaqstan» baǵdarlamasy boıynsha oblystyń sport mekemelerinde «Dene shynyqtyrý jáne sport monıtorıngi» avtomattandyrylǵan aqparattyq júıesi engizilýde. Ol barlyq sport mektepteri boıynsha biryńǵaı derekter bazasyn qurýǵa múmkindik beredi. Bul óz kezeginde sportshylar men jattyqtyrýshylardy qarjylandyrýdyń ashyqtyǵy men aıqyndylyǵyn qamtamasyz etedi, óńirde sport túrleri men ınfraqurylymnyń damýy týraly naqty jáne tolyq aqparat beredi.
Sonymen qatar mobıldi qosymsha da jasalyp jatyr. Onyń kómegimen kez kelgen adam óńirdegi sport mektepteri, federatsııalar men klýbtar týraly barlyq aqparatty, jumys kestesin bile alady, sondaı-aq paıdalanýshylar úshin qosymshada jattyqtyrýshylar týraly málimetter men balany sektsııaǵa jazý atqarymy bolady.
Oblystaǵy balalar sportpen shuǵyldanýǵa jaǵdaı jasaý úshin kóptegen jumystar atqarylyp jatyr.
Eń jarqyn mysaldardyń biri - Qaraǵandy gımnastıka mektebiniń tárbıelenýshileri, jastar arasynda sporttyq akrobatıka boıynsha álem chempıonatynyń jeńimpazdary Nıkıta Amoskın men Anastasııa Dolganıýk. Novodolınka kentiniń týmasy Nıkıta jýyrda «Qazaqstannyń 100 tulǵasy» respýblıkalyq jobasynyń jeńimpazy atandy.
