Qaraǵandy oblysynyń 2021-2023 jyldarǵa arnalǵan bıýdjeti bekitildi
QARAǴANDY. QazAqparat - Qaraǵandy oblystyq máslıhatynyń depýtattary onlaın rejıminde ótken kezekti XLІV sessııada aldaǵy úsh jylǵa arnalǵan basty qarjylyq qujatty bekitt, dep habarlaıdy QazAqparat óńir ákimdiginiń resmı saıtyna silteme jasap.
2021 jyly oblys bıýdjeti 348 mlrd teńgeni quraıdy dep josparlanýda. Bul somanyń 51%-y áleýmettik salaǵa baǵyttalady. Óńirde pandemııa kezeńinde naqty qoldaý quralyna aınalǵan «Jumyspen qamtýdyń jol kartasy» baǵdarlamasyn iske asyrý jalǵasady.
- Shyǵys bóligine keletin bolsaq, bıýdjettiń jalpy kóleminiń 51%-y áleýmettik sala shyǵyndaryna baǵyttalady. Áleýmettik nysandardy jóndeý jáne olardyń materıaldyq bazasyn jańartý jalǵastyrylady. Bul maqsatqa bıýdjette 9,7 mlrd teńge josparlanǵan, - dep baıandady qarjy basqarmasynyń basshysy Lıýdmıla Basharına.
Ekonomıkanyń naqty sektorynyń shyǵystary 33,6 mlrd teńgeni quraıdy. Bul somanyń úshten bir bóligi, 10 mlrd teńge agroónerkásip keshenin damytýǵa qarastyrylǵan. Kásipkerlikti qoldaýǵa 1,7 mlrd teńge baǵyttaý josparlanýda.
Oblysta qoljetimdi turǵyn úı, ınjenerlik-kommýnıkatsııalyq jáne kólik ınfraqurylymy, sondaı-aq áleýmettik nysandar salý jalǵasady.
Lıýdmıla Basharına málim etkendeı, Jumyspen qamtý jol kartasy boıynsha 2021 jyly jalpy somasy 21 mlrd teńgege 19 ınfraqurylymdyq jobany iske asyrý josparlanýda. Bul aqshanyń kóp bóligi densaýlyq saqtaý nysandaryna jumsalady. Qarajat sport, bilim berý, TKSh salasyna da qarastyrylǵan.
Sessııada depýtattar sondaı-aq Qaraǵandy oblysynyń 2021-2025 jyldarǵa arnalǵan damý baǵdarlamasyn bekitti.
- Bul oblystyń aldaǵy besjyldyqqa arnalǵan damý josparyn aıqyndaıtyn mańyzdy qujat. Biz adamdardyń ál-aýqatyn jaqsartý úshin ne isteý kerektigin ózimizge júkteımiz. Birde-bir qala, birde-bir aýyl nazardan tys qalǵan joq. Basty baǵyttardyń biri – sapaly ınfraqurylymmen qamtamasyz etý: áleýmettik, ınjenerlik. Jol ınfraqurylymyn damytý jalǵasady. Qolaıly ınvestıtsııalyq ahýal qalyptastyrý jáne jańa ınvestorlar tartý – bul da bizdiń basymdyqtarymyzǵa kiredi, - dep atap ótti oblys ákimi Jeńis Qasymbek.
