Qaraǵandy oblysynyń 176 aýylynda taza sý joq

QARAǴANDY. QazAqparat - Qaraǵandy oblysynyń 176 aýylynda taza sý joq. Bul týraly Prezıdent Qasym-Jomart Toqaev Qaraǵandy oblysy jurtshylyǵymen kezdesýinde aıtyldy, dep habarlaıdy QazAqparat Aqordanyń baspasóz qyzmetine silteme jasap.

«Oblystaǵy 176 aýylda taza sý joq. Bıyl 37 eldi mekenge taza sý beriledi. Basqa aýyldardy kóp sozbaı sýmen qamtý qajet. Sońǵy jyldary Balqash kóli kúrt tartylyp barady. Elimizdiń ortalyǵyn sýmen qamtamasyz etetin Sátbaev kanalynyń tehnıkalyq jaǵdaıy máz emes. Bilikti mamandarmen birlesip, osy eki máseleni muqııat zertteýdi tapsyramyn. Kóldi saqtaý jáne kanaldy qalpyna keltirý úshin barlyq sharalar qabyldanýy kerek. Qazir sýdy tazartyp, tushytatyn zamanaýı tehnologııalar barshylyq. Qandaı shóldi jer bolsa da, halyqty aýyzsýmen qamtamasyz etýge bolady. Ákimdik iri bıznes ókilderimen birge bul jumysty myqtap qolǵa alýy kerek», - dedi Memleket basshysy kezdesýde.

Foto: krqe.com