Qaraǵandy oblysynyń 17, Aqmola oblysynyń 10 eldi mekeni sý astynda qalýy múmkin
ASTANA. QazAqparat - Qaraǵandy oblysynyń 17, Aqmola oblysynyń 10 eldi mekeni sý astynda qalýy múmkin . Bul týraly búgin Qazaqstannyń Ortalyq kommýnıkatsııalar qyzmetindegi brıfıngte QR Іshki ister mınıstrligi Tótenshe jaǵdaılar komıtetiniń tóraǵasy Vladımır Bekker málim etti, dep habarlaıdy QazAqparat.
«Qazirgi ýaqytta Samarqan sý qoımasyna sýdyń mol túsip jatqandyǵyn baıqap otyrmyz. Osyǵan baılanysty búgingi kúni Samarqan sý qoımasynan artyq sýdy aǵyzý bastaldy. Tańerteń sekýndyna 350 metr, saǵat 12-de sekýndyna 750 metr kólemde sý aǵyzylýda. Saǵat 17-ge qaraı Samarqand sý qoımasynan sekýndyna 900 metr sý aǵyzylady dep kútilýde», - dedi Bekker.
Komıtet basshysynyń aıtýynsha, osyǵan baılanysty Samarqan bógetiniń tómengi saǵasynda ornalasqan Chkalovo aýylynyń - 137, Sadovaıa aýylynyń 308 turǵyny qaýipsiz jerge kóshirilgen. Sonymen qatar aýyl turǵyndarynyń maldary da qaýipsiz aımaqqa shyǵarylǵan. Jaǵdaı baqylaýda tur.
«Samarqan sý qoımasynan aǵyp shyqqan sý Yntymaq sý qoımasyna, odan keıin Nura ózenine quıylady. Osyǵan baılanysty Nura ózeniniń boıynda ornalasqan Qaraǵandy oblysynyń 17, Aqmola oblysynyń 10 eldi mekenine sý astynda qalý qaýipi tónip tur. 2015 jyldaǵy sý tasqynyn qaperge ala otyryp, jaǵdaıdyń ýshyǵýynyń múmkindikterin eskerip otyrmyz. Halyq qulaqtandyryldy, qutqarýshylar sol jerde. Ákimdikter sý tasqyny oryn alýy múmkindikterin tómendetý sharalaryn qabyldaýda», - dedi ol.
Aıta keterligi, Qaraǵandy oblysy kóleminde ónerkásiptiń óristep, aýyz sý tapshylyǵynyń sezilýine baılanysty 1933 jyly Samarqan-Qaraǵandy sý arnasy qurylǵan bolatyn. Keıinnen 1939 jyly Nura ózenine bıiktigi 20, eni 300 metrlik bógen salyna bastady. Samarqan sý qoımasynyń qurylysy 1961 jylǵa deıin sozyldy.
