Qaraǵandy oblysyndaǵy jol apatynan 2 dáriger qaza tapty

Bul týraly QR Densaýlyq saqtaý mınıstrliginiń Telegram kanalynan málim boldy, dep habarlaıdy QazAqparat.
Dárigerler Balqash qalasyndaǵy «Qazaqmys» kompanııasynyń jumysshylaryn profılaktıkalyq qarap-tekserýden qaıtyp kele jatqan bolatyn. Olar mingen avtobýs MAZ markaly júk avtokóligimen soqtyǵysyp, jol apatyna ushyrady.
«Mınıstrlik atynan qapııada kóz jumǵan Kenjehanova Vıktorııa Islıamqyzy men Qystaýbaeva Baqyt Rashıtqyzynyń jaqyndary men otbasyna qaıǵyra kóńil aıtamyz.
Otolarıngolog Vıktorııa Kenjehanova men oftolmolog dáriger Baqyt Qystaýbaeva azamattardyń densaýlyǵyn qorǵaýǵa ondaǵan jyl ǵumyryn sarp etken naǵyz kásibı mamandar edi. Aımaqtyq densaýlyq saqtaý salasy orny tolmas aýyr qazaǵa dýshar boldy.
QR Densaýlyq saqtaý mınıstrligi jol apatynan qaıtys bolǵan dárigerlerdiń otbasy men jaqyndaryna kóńil aıtady»,-delingen habarlamada.