Qaraǵandy oblysyndaǵy JEO-lardyń jaı-kúıi qandaı
Búgingi tańda Qaraǵandy oblysynda 8 iri energııa kózi – jylý elektr ortalyqtary jumys isteıdi. Onyń ishinde 7 JEO jekemenshik ıelikte, bireýi kommýnaldyq balansta. Aıta ketý kerek, óńirdegi barlyq JEO oblys tutynýshylary úshin elektr jáne jylý energııasyn óndirýdiń aralas rejıminde jumys isteıdi.
Turǵyndar tarapynan eń kóp shaǵym Temirtaý JEO-2, Topar GRES-1 jáne Balqash JEO-ǵa qatysty aıtylady. Qaraǵandy oblystyq Energetıka jáne turǵyn úı-kommýnaldyq sharýashylyq basqarmasynyń aqparatyna súıensek, atalǵan ortalyqtardaǵy jabdyqtyń tozýy 75% asqandyqtan, olar aýtsaıderler tizimine engen.
«Bul stantsııalardyń barlyǵy ótken ǵasyrda, keńestik kezeńde salynǵan. Búgingi tańda bizde barlyq jylý ortalyqtaryn sanaǵanda qazandyq jabdyqtarynyń tozýy shamamen 75% quraıdy, al týrbınalardyń tozýy – 70%. Olardyń ishinde eń eskileri Temirtaý JEO-2, Temirtaý GRES-1 jáne Topar GRES, Balqash JEO. Degenmen, bul stantsııalar negizgi jáne qosalqy jabdyqtaryn árdaıym jóndep otyrady. Jylytý maýsymynyń qorytyndysy boıynsha nemese jylytý maýsymynyń ótýi barysynda olar qajetti is-sharalar josparyn jasaıdy. Barlyq qarjylandyrý kózderin tirkep, aldyn ala sharttar jasasady», - deıdi Qaraǵandy oblysynyń energetıka jáne TKSh basqarmasy basshysynyń orynbasary Nurjan Naqypbekov.
Bıyl jylytý maýsymyna daıyndyqqa óńirdiń barlyq jylý elektr ortalyqtary 18 mlrd teńgeden astam qarajat jumsaǵan.
«Bul somaǵa negizgi, qosalqy jabdyqtar men qajetti toraptar jáne agregattardy jóndeý, olardy satyp alý kiredi. Álemdegi sońǵy geosaıası oqıǵalarǵa baılanysty jetkiziletin jabdyq kúrt qymbattaǵanyn umytpaǵan jón. Jylytý ortalyqtaryna Qazaqstanda óndirilmeıtin sorǵylar qajet», - dedi Nurjan Naqypbekov.
