Qaraǵandy oblysyndaǵy turǵyn úı qulaıyn dep tur
ASTANA. QazAqparat - Qaraǵandy oblysyndaǵy kóppáterli turǵyn úı qıraý aldynda tur, dep habarlaıdy tv.ekaraganda.kz.
Aqtas kentindegi eki qabatty ǵımaratqa qıraý qaýpi tónip tur. Jertóledegi tireýish qabyrǵa qulaǵan. Kóppáterli úıden 45 adam evakýatsııalandy.
Qazir, tótenshe jaǵdaı sebepteri anyqtalyp jatyr.
«Túngi 12-de gúrsildegen dybys estildi. Kórshi páterde birdeme qulaǵandaı boldy. Jertóledegi kóterýshi qabyrǵan qulaǵan eken. Kelesi kúni kórshilerdiń edeni tómendeı bastady. Qabyrǵalarǵa jaryqshaq tústi», - deıdi sol úıdiń turǵyny Irına.
Birinshi qabattaǵy páterlerdiń eden taqtalary jarty metrge tómendegen.
Jyldar boıy jertólege sý aǵyp kelgen, biraq sýdyń qaıdan kelgeni belgisiz, dep jazady basylym. Úıdegi sý qubyry men káriz júıesinde aqaý joq. Turǵyndardyń málimdemesinen keıin ákimdik qańtar aıynda tehnıka jibergen. Ol kireberistegi sýdy eki kún boıy tartyp shyǵarypty.
Alaıda, úı uzaqqa shydamady. Qıraý sebepteri men qalpyna keltirý múmkindikterin sarapshylar uıymy anyqtaıdy.
Qaraǵandy oblysynyń Energetıka jáne TKSh basqarmasy basshysynyń orynbasary Ulantaı Úsenov ár taraptyń kinási anyqtalyp jatqanyn túsindirdi.
Ázirge Saran TJ bólimi úı oqıǵasyn tótenshe dep jarııalady. Jergilikti bılik saraptama júrgizýge qarajat izdestirýde. Tujyrymdama 10 kúnnen soń daıyn bolady.
