Qaraǵandy oblysyndaǵy Tórtkól kólinen joǵalǵan balyqshynyń denesi tabyldy
QARAǴANDY. QazAqparat – Qaraǵandy oblysynyń qutqarýshylary Tórtkól sý qoımasyna batyp ketken balyqshynyń máıitin tapty. Er adamnyń denesi jaǵadan 500 metr jerden tabyldy, dep habarlaıdy QazAqparat tilshisi.
10 qazanda birneshe adam Buqar jyraý aýdanyndaǵy Tórtkól kóline balyq aýlaýǵa shyqqan. Er adamdardyń biri qaıyqqa minip, al qalǵan dostary jaǵalaýda balyq aýlaǵan. Ózi jalǵyz qaıyqpen ketken balyqshyny joldastary sońǵy ret keshke kórgenin aıtady. Biraz ýaqyttan soń ony izdeýge shyqqan. Alaıda taba almaǵan. Kelesi kúni tańerteń 11 qazanda balyqshylar dosyn taba almaı, qutqarýshylarǵa habarlasqan.
«Іzdeý jumystarynyń birinshi kúni arnaıy top balyqshynyń aýdarylǵan rázińke qaıyǵyn tapty. Búgin qutqarýshylar sýǵa batyp ketken adamnyń denesin jaǵadan 500-600 metr qashyqtyqtan tapty», - dep málimdedi Qaraǵandy oblysynyń TJD baspasóz qyzmeti.
Qutqarýshylar azamattarǵa sý aıdyndaryndaǵy qaýipsizdik erejelerin eske salady.
- Jazataıym oqıǵalardy boldyrmaý úshin balyq aýlaǵanda jaǵalaýdan alys ketpegen jón;
- Sý aıdynyna shyǵar aldynda qaıyqtyń jaı-kúıin muqııat tekserý qajet, onyń zaqymdanbaǵanyna, eskekteriniń aqaýsyz ekenine kóz jetkizińiz;
- Qaıyqta ár adamǵa arnalǵan qutqarý sheńberi, belbeýi nemese keýdeshesi bolýy mindetti;
- Daýyldy aýa raıy kezinde sýǵa shyǵýǵa tyıym salynady.
