Qaraǵandy oblysyndaǵy tórt kenttiń turǵyndary sý tasqynyna baılanysty evakýatsııalandy
QARAǴANDY. QazAqparat - Qaraǵandy oblysynda sý basqan tórt kenttiń turǵyndary evakýatsııalandy, dep habarlaıdy «QazAqparat» HAA tilshisi.
Buqar Jyraý aýdany Kókpekti aýyldyq okrýgine qarasty Sarytóbe kentinde bir táýlikte 110 adam eki jolaýshylar vagonymen evakýatsııalandy. Turǵyndar Kókpekti kentindegi mektepke ornalastyryldy. Qutqarý jumystaryna jedel qyzmettiń 64 qyzmetkeri men 12 tehnıka jumyldyryldy. Dál qazirgi aqparatqa sáıkes, 5 aýlanyń aımaǵy, sonyń ishinde 1 jeke úı sý astynda qaldy», - dep habarlady TJD baspasóz qyzmeti.
Qaraǵandy oblysynda sońǵy eki táýliktiń ishinde Samarqand jáne Sherýbaı-Nura sý qoımasyndaǵy sý deńgeıi kóterilgen. Bul jaqyn mańda ornalasqan eldi mekenderge qaýip tóndirip jatyr.
«Ulttyq gvardııa áskerı bóliminiń sarbazdary, ákimdik qyzmetkerleri, TJD jasaqtary der kezinde apattyq-qutqarý jumystaryn uıymdastyrdy. Samarqand sý qoımasynda sekýndyna 450 tekshe metr sýdy bosatýǵa ári odan ary kólemin ulǵaıtýǵa baılanysty Chkalovo aýylynan 137 adam shyǵaryldy. Olar Temirtaý jáne Samarqand aýylyndaǵy týystaryna jetkizildi. 110 bas iri jáne 356 bas usaq qara mal qaýipsiz jerge kóshirildi», - dep habarlady TJ departamentiniń baspasóz qyzmeti.
Sadovyı aýylynda da dál osyndaı jaǵdaı oryn alyp, adamdar men janýarlar evakýatsııalandy. Nura men Baımyrza ózenderi túıisip, 12 aýlanyń aýmaǵyn sý basty. Birinshi mamyr aýylynda tasyǵan sý saldarynan 247 adam kóshirildi.
Qutqarýshylardyń aıtýynsha, óńirdegi jaǵdaıdy TJ departamentiniń jedel shtaby óz baqylaýyna alǵan. Sý basqan aýmaqtarda evakýatsııalyq is-sharalar júrgizilip, tasyǵan sýlar aıdalýda. Táýlik boıy ózendegi sýdyń deńgeıi qadaǵalanyp otyr.
