Qaraǵandy oblysyndaǵy Tómengi Narbaq sý qoımasynda bóget buzyldy
QARAǴANDY. QazAqparat - Qaraǵandy oblysy Shet aýdanynda bógettiń buzylýy saldarynan Qyzylorda-Pavlodar tas jolyna sý basyp ketti, dep habarlady QR ІІM TJK-nyń baspasóz qyzmeti.
«4 sáýirde saǵat 03:09 Qaraǵandy oblysy Shet aýdanynda Nura-Sary sý basseıniniń Tómengi Narbaq sý qoımasynda bóget buzyldy. Saldarynan respýblıkalyq mańyzy bar «Qyzylorda-Pavlodar» jolynyń 796 km tusynda 5-6 m jerdi sý alyp ketti. Basqa eldi mekenderge sý basý qaýpi tónip turǵan joq», - delingen habarlamada.
Atalǵan jolda avtokólikterdiń barlyq túrleriniń qozǵalysyna tyıym salyndy. Qaýipsizdikti qamtamasyz etý maqsatynda jolda beket qoıyldy.
Sonymen qatar, oblysta sý basý qaýpine baılanysty erigen qar sýynyń jolyn arshý boıynsha shuǵyl jumystar jasalyp jatqany atalyp ótilgen. Oǵan qutqarý qyzmeti men jergilikti atqarýshy organdardyń qyzmetkerleri tartyldy. Eldi-mekenderdi qorǵaý boıynsha sharalar júrgizilip jatyr.
Komıtettiń habarlaýynsha, Shet aýdany Sherýbaınura ózeni - Shopa kenti gıdrologııalyq beketinde sýdyń kóterilýi baıqalǵan.
