Qaraǵandy oblysyndaǵy sút zaýyty qarjy jetispeýshiliginen 10 jyldan beri bos tur
ASTANA. QazAqparat - «Zerger-Agro» aýylsharýashylyq óndiristik kooperatıviniń sút zaýyty 2006-shy jyly qurylǵan bolatyn. Jalpy aýdany - 740 sharshy metr. Munda sút óndirý jospary bolǵan, ol úshin Bolgarııadan arnaıy qurylǵy da satyp alynǵan. Ónim óndirý qýattylyǵy bir aýysymda 10 tonna bolýy tıis edi. Alaıda negizi qalanǵannan beri osy ýaqytqa deıin kásiporyn qarajattyń jetkiliksizdiginiń saldarynan bos tur, dep jazady ákimniń saıty.
«Nelikten zaýyt 10 jyl boıy bos tur?» - dep surady oblys ákimi Erlan Qoshanov óziniń Jańaarqa aýdanyna jumys sapary barysynda. - Onyń áleýeti qandaı?»
«Kásiporyn ıeleri ANK arqyly 62 mıllıon 800 myń teńge kóleminde nesıe alǵan bolatyn. Olarǵa áli 20 mıllıon teńge qaıtarý kerek, jyl sońyna deıin qaryzdy tolyq ótep tastaýdy kózdep otyr», - dep túsindirdi oblys ákiminiń orynbasary Serik Shaıdarov. - Áleýeti zor. Kooperatıv quramyz, nıet bildirýshiler bar, barlyq qujattar men esepter daıyn.
Jańaarqa aýdanynda jylyna shamamen 45 myń tonna sút óndiriledi. Ony satý qıyn. Óndiriletin súttiń tek 10 paıyzyn ǵana oblysymyzdyń iri kásiporny qaıta óńdeý úshin satyp alayp otyrady. Eger «Zerger-Agro» qaıtadan jumys isteı bastasa, aýyl turǵyndary úshin ol jaqsy qoldaý bolar edi.
Erlan Qoshanov bos turǵan zaýytty qarap shyǵyp, kásiporyndy qaıta qalpyna keltirý máselesin sheshýdi tapsyrdy.
«Kelesi jyly bul zaýytty iske qosaıyq. Ol uzaq ýaqyt boıy qur bos tur, al aýyl turǵyndary maǵan sútterin sata almaıtynyn aıtyp shaǵymdanýda. Bul máseleni sheshý qajet. Ol sizdiń jeke baqylaýyńyzda bolýy kerek», - dep aımaq basshysy Serik Shaıdarovqa tapsyrma berdi.
