Qaraǵandy oblysyndaǵy sýǵa ketken Kókpektide 40-tan astam úıdi jańadan salý qajet
QARAǴANDY. QazAqparat - Qaraǵandy oblysyndaǵy sýǵa ketken Kókpekti aýylynda aldyn ala esepter boıynsha 42 úı turýǵa jaramaıdy dep tanyldy, dep habarlady óńir basshysy Baýyrjan Ábdishev.
«Tutastaı alǵanda, esepteý jumystary aıaqtaldy. Qazir aldyn-ala esepter boıynsha, tolyq buzylǵan 42 úı qalpyna keltirýge jatpaıdy. Sarapshylar toby áli jumys jasaýda. Kelesi aptanyń basynda resmı qorytyndy shyǵarylady dep kútilýde. Sodan keıin osy úıler boıynsha naqty jumystardy pysyqtaıtyn bolamyz», - dedi B.Ábdishev Kókpektidegi buqaralyq senbilikte jýrnalısterge bergen suhbatynda.
Ol sondaı-aq 192 úıdi qalpyna keltirý úshin jóndeý múmkindigine tekserildi, dep qosty.
Oblys ákimi vedomstvoaralyq komıssııa jumysy aýqymynda birqatar saraptaý jumystary júrgiziletinin habarlady.
Qazirgi kezde Kókpektide tótenshe jaǵdaı saldaryn joıý jumystary jalǵastyrylýda. Shtab málimetteri boıynsha 31 naýryzdan 5 sáýirge deıin bul jumystarǵa 3000-nan astam adam, 600 birlik tehnıka tartyldy. Aýylda sýmen qamtý júıesi, 3,5 shaqyrym elektr jelileri, telefon baılanysy qalpyna keltirildi. 150 metr jol tósemi, jaıaý kisiler júretin kópir jóndeldi.
Budan buryn habarlanǵandaı, 31 naýryzda túnde Qaraǵandy oblysyndaǵy Kókpekti aýylynda bógettiń buzylýynan 300-den astam úı sýǵa ketti. Tótenshe jaǵdaı saldarynan 5 adam qaza boldy, 12 zardap shegýshi aýrýhanaǵa jetkizildi. Júrgizilgen jumystardyń nátıjesinde 125 adam qutqaryldy.
Qaza bolǵandardyń otbasylaryna 1 mln. teńgeden materıaldyq kómek berildi. Tótenshe jaǵdaıdan kelgen zalal 1 mlrd. teńgege baǵalanýda.
Úkimet qaýlysymen TJ mınıstri Vladımır Bojkonyń tóraǵalyǵymen tótenshe jaǵdaıdyń sebepteri men mán-jaıyn tekserý úshin vedomstvoaralyq komıssııa quryldy.
Oblystyq prokýratýranyń aqparaty boıynsha, tótenshe jaǵdaılarǵa baılanysty QR QK-niń 2-bólimi 316 baby boıynsha (adam ólimine soqtyrǵan nemquraıdylyq); Buqar jyraý aýdany ákimdiginiń jáne TJ bóliminiń qyzmetkerlerine qatysty; QR QK 232 babymen (óz mindetterine jaýapsyz qaraǵany úshin) «Shańyraq agrofırmasy» JShS (bóget ıesi) jáne «Tabıǵat HHІ» JShS (sý qoımasyn jalǵa alýshy) laýazymdy tulǵalaryna qatysty eki qylmystyq is qozǵaldy.
