Qaraǵandy oblysyndaǵy shahtadaǵy oqıǵa boıynsha tergeý bastaldy
QARAǴANDY. QazAqparat - «ArselorMıttal Temirtaý» AQ kómir departamenti «Qazaqstan» shahtasynda metannyń taralýy men úsh kenshiniń qaza tabýyna baılanysty eńbekti qorǵaý qaǵıdalaryn buzylý faktisi boıynsha qylmystyq is tirkeldi, dep habarlaıdy «QazAqparat» HAA tilshisi.
«QR QK 156-baby 4-tarmaǵy «Eńbekti qorǵaý qaǵıdalaryn buzý» boıynsha úsh adamnyń qaza tabý faktisi Sotqa deıingi tergeýdiń biryńǵaı tizilimine tirkeldi», - dep habarlady Qaraǵandy oblystyq ishki ister departamenti baspasóz qyzmetiniń jetekshisi Baqytjan Qudııarov.
Baqytjan Qudııarovtyń aıtýynsha, qylmystyq is toptyq qaıǵyly jaǵdaı faktisi boıynsha ǵana tergelýde. «Іs qandaı da bir tulǵaǵa qatysty emes, fakti boıynsha tergelýde», - dedi Baqytjan Qudııarov.
Eske salaıyq, 31 tamyz kúni 4 saǵat 21 mınýtta 332 D6-z № 1 jeldetkish túıisiminde (qazba júrgizgish kenshar) Qaraǵandy oblysy Shahtınsk qalasyndaǵy «Arselor Mıttal Temirtaý» AQ kompanııasyna tıesili «Qazaqstan» shahtasynda kenetten kómir qulap, gaz taralǵan. Apat kezinde shahtada túngi aýysymdaǵy 136 adam bolǵan, olar jer betine shyǵaryldy. Apattyq ýchaskede tórt shahter jumys istep jatqan. Úsh jumysshynyń óli denesi tabyldy,
Qazaqstan Respýblıkasy Investıtsııalar jáne damý mınıstrligi Indýstrıaldyq damý jáne ónerkásip qaýipsizdigi komıtetiniń «Kásibı áskerılendirilgen apattyq qutqarý qyzmeti» RMK qutqarýshylary tórtinshi kenshini izdep jatyr.
